المسامير

المسامير

شعر : هاشم صديق

يا بويا هّداني السهر 
مغروس على الليل منتظر
لي ضحكه من ثغر القمر
سدري مكشوف للجزيرة 
ومن وراي 
غرقت مراكب الرحله 
في عرض البحر
وفترتَ من سك الرهاب
ونزفت من طعن 
الخناجر والحراب

فوق الضهر
…………….
يا بويا قدامي الزمن
مجنون وغامض ومنقسم 
لا قدرت أطرد للشقا
لا ارتحت في وَلَه الرسم
قلّوني في جمر الأسى
ودقوا المسامير في الاسم
بذروا الأسف يا بويا
في عيوني وتغوا
وهدّوا الخواطر والجسم.
شالوني في طرف اللسان
شربوا العسل بصقوني سم
خلوني في الصحرا ومشو
صلبوني في شوك النضم 
……………..
مغروس على الحصا والغبار
والليل مسمر جوه فيني
وبره فات قطر النهار
ده الزمن يابويا عدمان
الضحك 
ولا القلوب صبحت حُجار؟!
ده الأسف يا بويا
مكتوب للخُطا
ولا الدروب مفتوحه 
للماشي اختيار؟
أصارعك يا ظروف كل يوم 
واهدّك ياجدار وجدار
اكوسك يا فرح مجنون
وأدوسك يا ألم غدار
وأغازلك يا عيون الناس
أفتش عن وضوح ونهار
ألاقي الفرحه غيم جافل 
وأشوف الناس
غموض وأسرار
متين يرجع صباح الحب
ويقع طوب العذاب منهار؟
رصيف الوقفه جَنّ معاي 
ولا دَقّ الجرس للعيد 
ولا طّل الصباح في قطار.
……………..
لكني زي كل الظروف
مديت لساني على الألم 
قبّلت من وش السأم 
وشهرت في الظلمه القلم
شهرت في الظلمه القلم.