رصد الحراك الثوري (الثلاثاء 30 نوفمبر)

رصد الحراك الثوري (الثلاثاء 30 نوفمبر)
********************************

✍🏼 : مهادن الزعيم

✵ من الصباح السوق العربي كان هادي بس حشود الناس المتحركة في الشوارع كانت كبيرة شديد وكل الناس كانت في حالة ترقب وإنتظار ….
✵ قبل انطلاق الموكب في السوق العربي جاتنا اخبار عن مواكب ضخمة سيروها طلاب المدارس في المهندسين بأمدرمان ومدينة الابيض بشمال كردفان وناس امدرمان كتموها في شارع الاربعين قبل الوقت المحدد للموكب ….
✵ الانتشار الامني كان مركز في مساحات محددة (عملوا صندوق حول القصر من تقاطع القصر مع المك نمر لحدي مقر لجنة إزالة التمكين وكمل المربع جنوبا لحدي شارع النيل) …..
✵ المربع دا كان فيهو ابوطيرة + شرطة الشغب اما نقاط بنك بيبلوس وهندسة الخرطوم (الكان مفروض يتجمعوا فيها الثوار) شهدت تمشيط مستمر من قبل بكاسي بها عناصر ترتدي زي مدني …..
✵ رتل من تاتشرات ابوطيرة كانت شغالة تمشيط ووصلت لحدي صينية القندول قبل الموكب ورجعت تاني للمربع ….
✵ الساعة الواحدة بتوقيت الثورة بدت المواكب تتجمع وسلكت شارع الحرية ودخلت شارع السيد عبدالرحمن وارتكزت في صينية القندول …..
✵ الموكب وقف في القندول حوالي 50 دقيقة لحدي م الحشد بقى كبير شديد وبعدها واصل الموكب سيره شرقا (حرفيا الشارع مليان ثوار من القندول لحدي المريديان)….
✵ الساعة 2 ظهرا في تقاطع شارع السيد عبدالرحمن مع القصر قابلنا موكب ليهو اول م ليهو آخر جاي من باشدار وحديقة القرشي (لا نحن شايفين نهاية الموكب بتاعهم لا الناس الجو في الموكب عارفين حدو وين لكن قالوا نهايتو لسة في الديم)  …
✵ اتحركت المواكب كلها بشارع القصر ولمن وصلنا البنك الفرنسي حوالي الساعة 2:11 دقيقة بدأ القمع من قبل قوات الشرطة المرتكزة في تقاطع الجمهورية مع القصر ….
✵ البمبان كان نازل علينا ذي المطر وبرضو الشباب كانو مصنددين وراكزين في الخط الامامي رغم كمية الاصابات والاختناقات بين الثوار …
✵ الشرطة لمن شافت الشباب مصنددين بقت تصوب البميان مباشرة ناحية الثوار ودا ادى لعدد كبير من الاصابات في الرأس والوجه (دا غير القنابل الصوتية الاتسببت في قطع كف احد الثوار) …
✵ الثوار عملوا التفاق علي العساكر بتقاطع المك نمر مع البلدية واجبرو الشرطة علي التراجع قليلا وفي ذات الوقت العساكر عملوا التفاف علينا من اتجاه عمارة الدهب ورموا فينا كمية بمبان خرافية والهوا كان مساعدهم فأضطر الثوار لبعض التراجع بسبب كثافة البمبان …
✵ الساعة 2:30 استعانت الشرطة باتنين من مدرعات البمبان قدرت تتجاوز بعض المتاريس في شارع القصر وضربت بمبان كثيف تجاه الثوار فأضطرو للتراجع قليلا قبل ان يتقدموا مرة اخرى …..
✵ الساعة 3:10 الشرطة شافت الثوار لسة مصنددين وبقت تطلق عليهم رصاص حي علي المتظاهرين ونتج عن ذلك اصابة احد الثوار (في انتظار تقرير لجنة الاطباء المركزية حول عدد الاصابات النهائية للموكب) …..
✵ في ثوار اتجمعوا في بحري وعملوا موكب ضخم واتجهوا بيهو ناحية الخرطوم لمساندة الثوار (محاولة فك الصندوق) لكنهم اتعرضوا لقمع خرافي في الكبري وتم منعهم من الوصول للخرطوم …
✵ المواكب استمر في حالة كر وفر مع الشرطة وسط صمود وبسالة منقطعة النظير وهتافات تشق عنان السماء من قبل الثوار وغيوم من بمبان الشرطة وقنابلها الصوتية …
✵ رجعنا امدرمان المغرب لقينا الشفاتة مترسين شارعي العرضة والاربعين والبمبان مدور وبعدها الموضوع اتحول لرصاص حي بعد المغرب (دا حصل بعد مطاردات للثوار في شوارع الحلة في بداية الموكب) واتجمع الثوار لاحقا وأضطرو يصنددو في الشوارع الرئيسية ويترسوها …
✵ في الولايات انطلقت عشرات المواكب في المدن والقرى حيث شهدت مدن القضارق وكسلا وبورتسودان مليونيات كبيرة وبصراحة الحشود كانت مهولة في كل المواكب دي وناس كسلا عملوا اعتصام يوم واحد …
✵ خرجت مواكب قوية في كل من البرقيق وكرمة واتجهت لدنقلا لتلتحم بالحشود الموجودة هناك وارتفع الهتاف ……
✵ مواكب للمناقل ومدني ورفاعة وقرية الجبلية بولاية الجزيرة كان فيها حشود خرافية وهتفوا ضد حكم العسكر ورفضوا الانقلاب جملة وتفصيلا ….
✵ خرجت مواكب كبيرة في كل من وكوستي وربك والدويم (اي واحد من المواكب دي كان مليونية براهو) وجميعها نادت بإسقاط الانقلاب ….
✵ مواكب سنار والدمازين كان فيهن حشود خرافية وشغل مرتب علۑ اعلى مستوي وهتفوا ضد الانقلاب العسكري ونادوا بتسليم السلطة للمدنيين والعسكر للثكنات ..
✵ مدن دارفور (نيالا الفاشر زالنجي) كانت موجودة بقوة في دفتر اليوم الثوري بمواكب كبيرة وهتافات قوية تطالب بحل المليشيات وايقاف القتل الممنهج وإسقاط الانقلاب ومن يدعمه ……
✵ ولاية نهر النيل كانت حاضرة في دفتر اليوم من خلال ثلاثة مواكب في كل من (عطبرة الثورة) والدامر وشندي ورفعوا صور الشهدا۽ في المواكب وطالبوا بالقصاص لهم بعد إسقاط حكومة الانقلاب ….
✵ جل مواكب اليوم شهدت قمع من الشرطة والاجهزة الامنية (وصل حد الافراط في القمع في بعض المواكب) كما كانت الاعتقالات حاضرة بقوة في الخرطوم وامدرمان والقضارف وربك ومدن اخرى (لم يتثنى لنا حصر كل الاعتقالات التمت خلال اليوم حتى الان) ……
✵ هناك مواكب اخرى خرجت في بعض المدن سوف يتم اضافتها للرصد فور التأكد منها (ملحق مع الرصد عدد من صور والفيديوهات لمواكب اليوم) …
✵ عاجل الشفاء للجرحى والمصابين والرحمة للشهداء والشعب اقوى والردة مستحيلة …

#مليونية30نوفمبر
سلام ومحبة