Laa-Laa لا لا موقع شباب السودان الحر
كان في قديم الزمان سلطنة سموها الجوغان، وكان حاكمها تعيس حار وجليد جنس جلادة كلو كلو ما بتتخيلها.
أها ناس السلطنة زعلو من سلطانهم دا حاااار، واتفقوا يغيرو ويجيبو سلطان جديد ممكن يكون ارحم ليهم شوية، ويصلح البلد ويرخص الشغلات ويوقف الغلا ويعيشو في أمن وأمان.
اها الناس دول عملوا ثورة ومظاهرات كبيرة بالحيل، وألجمعو واتحكرو في دانقاية قدام بكان الديش، وقالوا ما بنتتر أبدا الا السلطان المزنوح دا يختانا.
الموضوع بقى كبير والدنيا كلها سمعت بيهو .
رؤساء ديش السلطان قعدو فكرو وقالو: الناس ديل ما بفرو بأخوي واخوك وشغلهم دا بقي كلام نجيض، والسلطان دا خلاص الا نشيلو برة الحكم ونحن نحكم بدلو!
عيطو لناس السلطنة وقالوا خلاث السلطان شلنا وحبسنا في بيتا، يلا ارجعو بيوتكو والدايرنا عملنا ليكو!
في جماعة كدا محتالين سموهم (دنقدنق) قبال الثورة كانو في بلد سموها كراعك فوق، بتشاورو مع السلطان عشان يديهم نصيب في الحكم، والسلطان قاليهم تعالو السلطة راااقدة متل بصل الكنجي، وقربو يجو علا الثورة خربت ليهم الدرب وشافو السلطان خلاص بقى متل شعبة الكوزي المخوخة، وقالو احسن ننتظر شوية لغاية مع الواطة تتكشف والأمور تبقى واضحة عشان ما نقع في البير.
طبعاً ناس دنقدنق ديل بحبو الحكم حااار، وقبال سنوات عملو إتفاقيات (فقعت وطارت) مع السلطان وانطاعهم قريشات سمحات وسلطة، إلا بتن قبل شال منهم السلطة، واحدين منهم عردو دقشو الخلا شالو السلاح بداوسو السلطان.
وكل ما السلطان يتزنق بقول ليهم تعالو نقعدو نتفاكرو، والجماعة بجو جاريين جري دقاااق ( جداد فسا).
اها الجماعة قعدو اتشاورو في البعملو شنو وزولهم السلطان خلاص طيارتا صفرت!
قام كبير أخوانو قال ليهم تعالو نعملو لينا تحالف عشان نقود بيا الناس المتظاهرين ديل، قالو دي فكرة سديدة، دا الراي يا كبيرنا (مناخر الكيك ، حلاب الجداد) .
الزعيم نده تليس وحرقاص ورايو وجعيبات أبو أندينقا اكتبوا لينا ورقة التحالف عجلة عجلة.
الورقة لما كتبوها كلهم وقعوا فوكا، وعيطو للناس التانين يوقعو عشان يكبرو الكوم.
في جماعة قرقاجة بلباصين عملوا ليهم تحالف دكاترة ومدرسين وسواقين وصنايعية وقعو عليها ( والتعيس وخايب الرجا )
أها توا جا وكت تنفيذ الفكرة، طوالي مشوا لرؤساء الديش وقالوا ليهم نحنا الشعب فوضنا عشان نتكلم معاكو، والشعب لا ايد لا كراع، لكن تقولو شنو ما الحرامي عينو قوية حااار.
اها اتفقو مع الديش يعملو حكومة (عجبا كومة) واي طرف يشيل ليا عود، علا اختلفو في تقسيم العيدان واتجاخرو فوكا.
الديش قاليهم لو عايزين نتقاسم معاكو امشو كلمو ناسكو القاعدين في دانقاية الديش يفرو منها، قالوا خلاص بنكلمهم.
رسلو حمبرة وفسية الديك واللوليج موية الطشت عشان يتكلمو مع المتظاهرين.
المتظاهرين قالوا ليهم منو البفر من البكان دا؟ وعاطو فوكم مدنياااو مدنياااو مدنياااو.
الجماعة رجعو للدياشة بخفي حنين خجلانين وضهرهم انكشف، اتاري الدياشة مناعيل دايرين يشوفو صحي الناس ديل وراهم الناس ولا هم متسلبطين ساكت قرقاجة ولمتهم بوطة!
الدياشة قالو ليهم توا نحنا دايرين نطرد الناس من قدام دانقاية الديش حتي نتقاسمو السلطة معاكم ، ولا رايكو شنو؟ ، قالو ليهم سمح موافقين.
اها الدياشة مشو كتلو المتعتصمين قدام دانقاية الديش كتل غبينة وربطوهم وجدعوهم في الالمي!
جماعة القرقاجة ودندنق حسو بالورطة، ولكن قالو خلاص عشان نرضي الناس نوقف التفاوض مع الدياشة ونقول للناس تاني ما بنقعد مع الدياشة القتلة ديل!
بعد تلاتي يوم، قابلو الدياشي بعشوم الدبك وكلدنق ، وقالو ليهم انحنا بكرة جاين نقعدو معاكو عشان نتوصل لاتفاق في تقسيم السلطة بيناتنا، الدياشة قالو ليهم تعالو حبابكو عشرة انتو ما ناسنا وحبايبنا!
طوااالي قوام قوام وقعو الاتفاق ومضوا عليا واي زول شال كومة…
وحدس ما حدس
محمد عبد الرحمن الناير (بوتشر)
١٠ مارس ٢٠٢٠م
