مظفر الفكى
تلفوني جلكسي قافل كهرباء من بي الليل
فتحتو الصباح وانا راكب في المواصلات جاي من امدرمان للخرطوم
عملت كم اتصال والرصيد خلص
نزلت من الحافلة في شارع الجمهورية جمب جامعة النيلين شان اشحن رصيد واركب مواصلات بري
قطعت الشارع مشيت الكشك نزلت رصيد
وانا راجع اقطع الشارع للمواصلات
اشوف تلاتة شباب علي يميني جايين علي وبعاينو لي بي حرقة
اتلفت شمالي اشوف زيهم علي بعد مترين
عرفت اني محاصر
والشارع عرباتو جارية ماف طريقة اهرب
لاشعورياً ختيت تلفوني في الجيب الخلفي
قبضنوني اتنين من القاش وحاوطوني بقية الأمنجية
قلت ليهم مالكم ياناس
واحد فيهم قال لي معاك جهاز الامن الوطني
وقفو العربات الجارية في الشارع
اتاريهم متابعني بي بكاسيهم من فتحت تلفوني
حاولت اتجرجر عليهم قلت احتمال طلاب جامعة النيلين يفهمو الكيس ويساندوني
قامو جروني من ايدي بالقوة لحدي واحد من بكاسيهم
ورموني جوة ضهرية البوكس
اها بعداك هاك ياملاوة وهاك ياضرب بالخراطيش الخاتينها في البوكس
كانو معاي زي خمسة امنجية
بضربو فيني بي كل قوتهم
والبوكس جاري ومعاهو
همي الوحيد وقتها انو الهيهم بالضرب شان اتخلص من التلفون مايقع في يدهم يسهل ليهم من قبضة رفاقي
اها فعلاً قدرت أخدت التلفون بالجابس من جيبي الخلفي وجدعتو في الظلط ووطتو العربات البعدنا
الحتة دي زعلتهم للدين
وقفو البوكس وجرا واحد علي التلفون لقياهو خردة
رجعو يضربو فيني بزعل اكتر
لحدما وصلنا مكتب أمن ولاية الخرطوم
وكانت قصة تعذيب استمرت تمانية ايام حتي نقلوني كوبر بعداك
اها في نفس اليوم داك بالليل دخلوني مكتب للتحقيق
اتاريهم مشو شركة زين للاتصالات طلعو شريحة بدل فاقد شان يشغلو الواتساب حقي
لمن مشيت كوبر لقيت اغلب الرفاق قبضوهم بمتابعة تلفوناتهم
بعد اطلقو سراحي
رجعت لناس زين اطلع شريحة اتصال بدل فاقد لقيت انو الشريحة مسجلة بأسم بت رغم انو عقد الشراء معاي ومكتوب بإسمي
شفتو كيف وساخة شركات الاتصال