Laa-Laa لا لا موقع شباب السودان الحر
1:
بعد خروجنا من المعتقل وانتظامي في العمل الحكومي والعام ،خرجت في يوم من المكتب بي حلة كوكو ومريت علي طرمبة خلف الكهرباء في كافورى لاكب بنزين،اذا بالشخص الامامي يقول لي،ازيك يا دكتور…المهم هو بركن العربية وانا كبيت وبركنت وسلمت عليهو لكن اشيل و اودي ما غريب علي…عرفني بي نفسو تذكرت احد ضباط الامن الذين كانوا بيحققوا معاي…وحقيقة كان زول مهذب …
تبادلنا التحايا..وقلت ليهو وين ناس علي عثمان ونافع البيقولو الناس ديل بتمولوا من الخارج،واشرت الي علامة التاكسي التي اضعها في عربيتي و واصلت ياخي انا بشتغل ترحال عشان اقدر اصرف علي اولادي. .الماهية ما بتكفي….ضحك قال لي ديل ناس تافهين…
تبادلنا ارقام الهواتف وقال لي نتواصل…
2:
في أثناء الاعتقال وبعد تحقيق وانا ماشي مع العسكرى لكي يرجعني الزنزانة ،لحقنا احد الضباط واخذني علي جنب كدة وقال لي داير رقم تلفونك قلت تلفوني عندكم،قال لي ما داير اشيلو من هناك المهم اديتو الرقم ..
حقيقة هو اثناء التحقيق ما كان بيوجه لي اسألة اغلب المرات كان مستمع وانا كنت بجرهم اثناء التحقيق عن الوضع الاقتصادي المتردي وبضرب ليهم مثل بي نهضة رواندا وأثيوبيا…
بعد خروجنا من المعتقل بي فترة واثناء المفاوضات مع المجلس العسكري المتعسرة،اتصل بي مرة قال لي وصف لي مكان العمل … قلت ليو بتعرفوا جيتو اعتقلتوني منو … المهم ضحك وصفتو ليو وقال لي اسمو بعد فترة اتصل بي وقال لي انا جاي عليك انت وين .. قلت ليو انا في المكتب بعد شوية ماشي علي مقر التجمع ممكن تصلني هناك .. قال لي .. لا لا لا مابجيك هناك … ممكن تنتظرني نص ساعه بصلك المهم وصلني مكان العمل و سلامات وكده .. شاب ما كان بيوجه علي اسئله اثناء التحقيق قال لي داير اعرف تقديرك للوضع الحاصل وهل ناس المجلس العسكري بيوقعوا معاكم قلت ليو بيوقعوا وكراعكم فوق راسم اولا هناك ضغوط دولية وافريقية عليهم لكي يسلموها للمدنيين وكمان انتو زاتكم ضدهم لأنكم خايفين علي مستقبلكم والكيزان ضدهم والاهم من ذلك شفت يوم ٣٠يونيو براك دي ماقيامة عديل كانت . المهم لقينا في بعض التلفونات اسرار وعلاقات بعض ناس الامن قالوا يبتزوا بيها المعتقلين وحقيقة صلاح قوش رفض وقال اصلو ما تعملوا الحاجه دي .
قلت ليهو انو الكيزان ديل أكثرهم انصاف رجال وانتو بتدافعوا عنهم وممكن اديك أمثلة .. المهم بعد داك ودعني والمهم انا كنت داير اعرف رايك في موضوع التوقيع وتحليلك للوضع لانو انا ما بقعد في السودان كتير المهم شكرني .. وقال لي عليك الله الزيارة دي لا. ناسك ولا ناسي يعرفوا بيها ….
د.ابراهيم حسب الله
