حكاوى الزنزانة ١٧ الزيارة وخلوني ارجع الزنزانة

جاء اهلي لزيارتي وعادة تتم الزيارة في سجن كوبر حيث ينقل المعتقلين إليه للزيارة، سالت بعض المعتقلين من العدد المسموح له بي الزيارة من الأهل ،قالوا لي أربعة أشخاص ….
عندما جاء دوري واخرجوني من الشرقيات الي المكتب الذي تتم به الزيارة وجدت اخواني الأربعة بي زوجاتهم واتنين من شقيقاتي بالإضافة زوجتي وابنائى الثلاثة …. احتلال اولاد حسب الله لسجن كوبر….بعد السلام والمطايبة …سالت عن أحوال الأسرة وأحوالهم المالية وهل مرتبة قعد يصلهم ….كواليتي نط شقيقي طلب وقال لي والله لو قعدت في السجن تاني شوية احتمال يبنوا ليك بيتك الما قادر تتمو والله اولاد الحلة وزملاء الدراسة واصدقائك والجيران  والمعارف والحزب لم يقصروا لم يقصروا  ابدا في الدعم المالي والمعنوي غايتو اولادك عايشين احسن مما كنت معهم…….
كنت قلق على ابني اسماعيل جدا لأنه شيطان شوية ..قالوا لي ما بيفارق البيت ابدا وبيستقبل الضيوف الذين لم ينقطعوا لزيارة الأسرة ودخل كورس تقوية صيفي…. وبقي زول عاقل …
تذكرت حوار دار بيني وبين الخطيب (سكرتير الشيوعيين )  قلت ليه والله بس خايف على الولد ،زول شيطان …. قال لي تعرف في بعض الأحيان يحدث عكس مخاوفك ، فعدم وجودك ممكن يخليهولك يشعر بالمسؤولية وقد كان … الولد بقي ثورجي قال لي بخامات البوهية (تبرع من لجان الحلفاية ) شخبت بيها الحيط في الحلة والبيت ،امه خافت ومسحت ألفي حيطة البيت وطوالي صابيها في القيادة في الليل وبيرجع الصباح. .  … (ثوار بالليل) …..
طلب سال العسكري إذا كان الوقت المسموح بالزيارة انتهي العسكري قال ليهو بين ١٥ الي ٢٠ دقيقة لكن واصلوا في الونسة ،شكلوا العسكري مستمتع بي خستكات اولاد حسب الله وداير يسمع….

انتهت الزيارة ، وعليه قررت بعد الإفراج عني اعمل لي مصيبة غير مخلة بالشرف والأمانة وارجع الزنزانة تاني كلما اولادي مرتاحين وانا ذاتي في عضمي ارتاح..واكتب ليكن حكاوي سجين في حلقات….
رمضان كريم،وتصموا وتفطروا علي خير …
بطلوا الجرسة كل الباقي منو ٢٩ يوم بس …

د.ابراهيم حسب الله عبد المولى