الحلقه (٢) – مذكرات معتقله

الحلقه(٢) – مذكرات معتقله

تم اعتقالنا يوم ٥/٥ من مكتب نبيل اديب الاجتماع ده كان مرتب ليه مع مكتب الاستاذ نبيل اديب بواسطه المحاميين الموجودين في المكتب

لا نو المبادره اصلا” كانت مبادره من الاستاذ وتم الاتفاق مع محامين اخرين

اليوم الاول:

ونحن في الشارع لموقف شندي

في عربيه صغيره فيها ثلاثه ملاذم ولو بعيد ملاذم اول ديل هم نفس الضباط الكانو قاعدين ايام تفريغ داخلية البركس كان عندهم مكتب في الاسكان جنب مكتب شاع الدين مدير الاسكان

كنا بتسمع في كلام فارغ انا ومي من لحظة الاعتقال وحتي دخولنا موقف شندي

عن نبيل اديب واخلاقه

ونحن واخلاقنا

وعن الممكن يحصل لينا في الاعتقال

(تحرش لفظي وجسدي)

….وصلنا موقف شندي

نفس الضباط و معاهم جنود حايمين في الطابق

نحن قاعدين علي الحيط وتعلو اصوات الضرب والشتائم وكنت سامعه صوت

ياسر عز العرب بالضرب وبيهتف حريه نظام طعمجه وكده

تم ضربنا ونحن في الصالات قبل دخولنا للتحقيق انا وعن يميني زوله اسمها اسلام(لاقيتها مقبوضه قبلنا وطلعت في وقت متاخر)

وعن شمالي مي عادل وفي بداية الطابق نفيسه

في ضابط ضربنا السودان قفل ٤ مرات ياخ الضربه دي كريهه جدا” والراجل ده كان غليظ شديد

تم تحويلي لمكتب للتحقيق لقيت فيه ٤ ضباط منهم الزول القبضني ذاتو وكان سايق العربيه

وخرطوشين ووصله بتاعت شاحن لاب توب تقريبا

تم ضربي بيهم وانا قاعده في الارض علي الحيط

وبسمع في اتفه الكلام

عن ممارسة الجنس واصحابي وعلاقتي بيهم وانهم م رجال لو رجال خليهم يعارضو في الغابه محل الرجال

تم سؤالي عن اني لابسه ملابس داخليه

جاني عمك كبيير سألني عن وزني كم وعمري كم

وقالو لي اشتغل مخاطبه عن الوضع الطلابي

وتم التهديد بعمل فحص عزريه لكل المعتقلات

حقق معاي ضابط عن الحزب

والتنظيم (تفاصيل لاحقا)

كل الاسئله كانت عن الشارع الحزب والتنظيم

وعن طلاب في الجامعه

طلبة مني اتصل علي مروان وصفاء اجيبم الاعتقال

تم اقتيادي لمكتب الرائد/مهند عمر تولا

نائب الحرس الجامعي

وللعلم هو كان شاهد علي كل م حصل لينا

لدرجه انو قال لي ابلع بندول علشان الضرب م يوجعني ويخدر

وكتر خيرو فتش البندول م لقاهو 🙂

يتبع

وفاق قرشي