Laa-Laa لا لا موقع شباب السودان الحر
محمد بقاري حسب الله
#كل_الحكاية 
محمد بقاري طالب بكلية شرق النيل من دارفور ، دارفور الفيها حروبات وقتل وتشريد ، دارفور الفيها ما من حقك تعيش ناهيك عن انو تقرأ وتتعلم وبرغم كده محمد قرأ واجتهد وتعب واهلو تعبو معاهو لمن باعو الوراهم والقدامهم عشان يقرو ولدهم الراجنو يبقى سندهم ، وسفروهو الخرطوم عشان يقرأ الجامعة…محمد خلى وراهو اهلو وما عارف بسبب الحروبات هل حيقدر يرجع ويشوفهم تاني ، هل حيعوضهم تعبهم واصرارهم انو يسافر ويقرأ ويرفعهم!
في يوم من الايام رابطة طلاب دارفور كانت عندها فعالية ثقافية في الجامعة ، وهم قاعدين في أمان الله دخلو عليهم الكيزان بالسيخ والسواطير وهددوهم يا يبطلو الفعالية بتاعتهم يا يعتدوا عليهم، الطلاب رفضو وحصل اشتباك في الجامعة واحداث عنف مات فيها طالب من طلاب المؤتمر الوطني واتجرحو فيها طلاب كتير من الطرفين ، تاني يوم جهاز الامن اعتقل بقاري وسجنوهو واتهموهو بأنو قتل الطالب المات عشان هو كان قاعد وقتها !! وقدموهو لي محاكمات وحكمو عليهو بالسجن 5 سنين، والليلة اهل الطالب طعنو في الحكم واستأنفو وتاني المحكمة حكمت عليهو بالإعدام…!!!! عينهم في الفيل والزول الكتل ويطعنو في ضلو !!!
محمد الزول الطيب الماعندو كلام غير قولة الخير، الطالب الشال احلامو واحلام اهلو وجا بيها الخرطوم عشان يقرأ وينجح ويرفع راسهم ويشيل عنهم الحمل، محمد ما كتل ولا زول مشاكل وسيرتو طيبة حميدة، لكن ممكن فعلا يتعدم ، عارفين ليه ؟ لأنو من دارفور! ااي يخوانا عشان من دافور؟
اتخيلو انو انت تتهان وتتذلا بسبب لونك ولا قبيلتك ، وتتهان في بلدك كأنك غريب! محمد ما عندو ضهر كبير في البلد دي عشان يطلعو زي ما بطلعو اولاد المسؤولين ! محمد ما عندو غير رب العالمين و دعوات امو وخوف اصحابو الواقفين معاهو وعارفين اخلاقه شنو وانو ما بقدر يقتل نملة ناهيك عن زول،،!
قادرين تحسو احساس الظلم والقهر الواقع عليهو وعلى امو وابوهو واخوانو…احساس انك ما عندك قيمة عشان ما عندك زول تتسند عليهو وقت اتظلمت! عشان انت ما عندك قروش تدفعها تطلعك !
للأسف احنا كسودانيين فقدنا احساسنا ببعض كبشر وماشين في انو نفقد انسانيتنا تماما!!
لو رضينا بالظلم الواقع على محمد ممكن يقع بكرة على اولادنا او بناتنا او اخوانا واخواتنا وما نلقى اليقيف معانا !
خلونا كلنا ننقذ محمد بقاري ونوقع ونطالب بأنو يطلعوهو براءة لأنو فعلا برئ…
#اوقفو_إعدام_محمد_بقاري
#اطلقو_سراح_الوطن
#كلنا_بقاري
