بكتب اسمك في الشوارع

بكتب اسمك في الشوارع
وارسمك في الدنيا هالة
والمحال اقبل بدونك
جنة غيرك استحالة
لا لا والله وإلف لالا
لو جحيم في الدنيا انتي
جنة  غيرك استحالة
وانتي ياكي الباقية يمة
عزة في التاريخ  وهالة
ومن جبينك شمس تطلع
وفي سماك راقص هلالا ..

بكتب اسمك في الشوارع
وفوق شفاه بنوت  عذارى
وازرعك في الحلة نخلة
واغرسك في  كل حارة
وتبقي دنيا ،، وأحلى غنية
منية   للعشاق حيارى
وتبقي للضهبان ورايح
نجمة   العز   و المنارة ..

انتي  يا بلد المفاخر
نحنا بيك دايماً نفاخر
وديمة مرفوعي الرؤوس
يامسام جسد الزمان
يامهبط العز اللي كان
ياشامخة فوق كل الشموس
ياضاربة في الاعماق جذورك
وفي الغياب معلن حضورك
وشاربة ريد كل  النفوس
ساطعة في الكون ضاوي نورك
انتي   فوق عاليات    قصورك
ونحنا راكعين  ليك نبوس ..

بكتب اسمك في الشوارع
وارسمك في كل باب
اطبع اسمك في كتاب
وفوق جباه كل الصحاب
فوق خدود بنوت بلدنا
وفارسك الزول  المهاب
انحتك في الصخرة وردة
ونخلة في الأرض اليباب
وأرفعك علماً  يرفرف
عالي  يتخطى السحاب .
…….،،،.،،،،،،،،،،،،،،،
مع تحيات / خضر عطا المنان
الدنمارك