*#الصرفة*

خالد ضياء الدين

وانا قاعد فى المكتب برفع السماعة وبتصل على(……)بتاعت الشاى.عليك الله يافلانة كباية شاى مظبوطة..وبالله معاك اتنين جبنة بدون دواء..و…و…الخ.
ست الشاى المسكينة تجى بى نفسها وبى طيبة خاطر  تجيب لى طلباتى وانا اشكرها واقيف احييها بكل احترام لانو ست الشاى فى السودان بقت خط احمر للمثقفين يجب ان تعامل هكذا.
المهم فى يوم جاتنى وقالت لى يا استاذ عندنا صندوق تدخل معانا؟
بى كم سألتها؟
قالت لى بى  50
طوالى معاكم بس نحن كم والصرفة كم؟
قالت لى معانا حليمة بتاعت العصيدة وعمر بتاع البنشر وعددت لى المشتركين..قلت ليها على بركة الله والصرفة كم؟
قالت لى 15000 !!!
يازولة…انت جادة؟
وسال لعابى..يعنى حا اصلح سقف البيت واشترى للمدام غسالة وابحبحها على نفسى بى 2 جلابية ومركوب فاشرى نفسى فيه من زمن .اصلو بقى اغلى من الجزمة الايطالية.وبينما انا مسهى وبحسب فى غنم ابليس سمعتها.
اها يا استاذ فى نفرين مادفعت ليهم عزيزة وعوض كنافة.يعنى 50 امس و50 اول امس وخمسين الليلة!!!
كيف الكلام دا هى الصرفة ما 50 جنيه كل شهر؟؟؟
ضحكت(……)حتى دمعت وقالت لى شهر شنو…50 كل يوم دا الصندوق!!!
وجدتنى مثل عادل امام فى الود سيد الشغال لمن راح يحسب ثمن الصحن الذى كسرو….يعنى 50 × 30 يوم تطلع بى 1500 فى الشهر ومعانا مصاريف اليوم والمواصلات و…..يعنى باقى من الماهية كم لمن نطلع بالواحد =صفر!!!
طيب يااستاذه (……)انت قاعدة تدفعى يوميا50 جنية للصندوق؟
ردت على هذه المرة بكبرياء انثوى دا الصندوق الصغير ..عندنا صندوق الاسبوع بى600 جنية.
يازولة؟
ماتبالغى.
والله جد دا ماسكاهو حليمة.
انا غايتو حسيت انى صغييييير وصفر كبييير.
معقول ؟
ناديت ابو العز ….هل تعلم يا ابو العز انو (……)بتاعت الشاى داخلة فى صندوقين اليوم بى 150 جنية؟
يعنى قدر مرتبى ومرتبك فى الشهر!!!
وقعدنا نندب حظنا العاثر …ليه ماطلعنا ستات شاى.
اها من اليوم داك حرمت اتصل بالتلفون على (…..)وبقيت امشى لحدى عندها وبكل ادب واحترام لا يخلو من انكسار وبتمتمة وصوت واااطى .عليك الله يا (…..)لو سمحتى كباية شاى.وهى دائما تسألنى سكرك ذاتو…اقول ليها اااى عادى …خفيف.وبى جواى اقول لى نفسى خفيف خفيف الخفة الشغلتنا موظفين…وبى طرف عينى اعاين لى علبة القروش المليانة .
مانى حاسد ومانى بغران الا براكم احسبوها معانا مش حقو يكون فى يوم كل اسبوع تضامنا مع الموظفين؟