القراية ام دق

عدنا
القراية ام دق :

قصة الطالب المكار
كنا في احدي الخلاوي لتحفيظ القرآن الكريم وعلوم الاحاديث النبوية مع الشيخ اسماعيل ادريس رحمه الله. كنا نأتي قبل صلاة المغرب عشان نصلي المغرب حاضر مع الجماعة في المسجد ونواصل الدرس مباشرة، والواحد لو اتأخر ما جاء قبل حلقة التلاوة تنجلد اربع منو او (فره) لذلك عندما نتأخر نأتي المسجد ونقيف خلف السور ونفلق بالحجارة للطلبة، يقوم الشيخ بإرسال مجموعة من الطلاب ليقبضوا لهؤلاء المجرمين الذين يضربون الطلاب بالحجارة من خارج اسوار الخلوة ،  نقوم بالفرار ونتساكك مع بعضنا البعض ونحن متفقين ونأتي قريب لنهاية حلقة التلاوة. عائدين و ماسكين واحد اصلاً ما عندوا علاقة بما حصل بس نقول دا هو العمل العملية، نلبس فيه التهمة. وكمان يا ويلك لو كنت متشاكل او زعلان مع واحد في الحله، اليوم داك نشيلك من خشم بابكم نرفعك نوديك الخلوة عشان تتجلد!!
سبب البلاوي دي كلها قراية ام دق!!
بدل يحببوا لي القرية بأسلوب مرن عشان تتعلم وتستفيد بس جلد في جلد .
اليوم كلوا قراية الصباح بدري الخلوة وتجي بعد شراب الشاي تذهب المدرسة تخرج من المدرسة  بعد نهاية اليوم وطوالي الخلوة وتجي راجع البيت شوية كدا تاني الخلوة تصلي المغرب حاضر في جماعة وملزم
وتعود البيت…

نفس السيناريو باكر الصباح، الصبح حاضر وكل شيء حاضر، هو اصلوا ما حاضر بس مع الجلد قلنا حاضر.

وفي المدارس من الصباح كل معلم يحمل صوط في الطابور الصباح للمتأخرين والوسخانيين والغائبين امس او غائب حصه يا ويلك!!
والبرنامج الصباحي اليوم للفصل الفلاني ليه ما جاهز.
حصتين جلد والباقي انصراف على الفصول
يجي الاستاذ داخل الفصل اول حاجة الما مصحح يطلع بره…؟؟
الما حله التمرين يطلع بره…؟؟
حصه جلد!!
شوية كدا الاستاذ يشوف ليه في الشباك انا احب…..  ومرسوم قلب ♥ وخنجر عجب والصيام في رجب!!
والفصول مختلطة
قوم يا ولد نادي استاذ فلان وفلان.  والاصوات ترتفع والعقوبة تزداد ، كل واحد خمسة جلدات
الحصتين الاولى انتهت
جينا بعد الفطور والألفة زعلان يملا الورق باسماء المهرجلين اييييك تاني جلد
هكذا القراية ام دق

لمن يأتي فصل الخريف المدارس بتعجز ويبقى الخلوة شوكة هوت بعد دروس الصباح الشباب الكبار يمشوا مع الشيخ في الزرع مساعدة نقضي نهارنا في العمل ومستمتعين نتسكع نلعب ونتمنى  ما نرجع
هكذا القراية ام دق

 محمد بشير