برنامج يوم بكرة…

برنامج يوم بكرة…
…….
بكرة الاحد بداية العصيان المدني…خليك عارف من هسه انك لامن تتخذ قرارك بانك بتحدد في مصير شعب كامل ووطن عظيم.
…….
غمض عينيك وخت جنبك كباية شاي او قهوة…اقعد براك في الاوضة او الشارع او جنب البحر…ولازم تفكر كويس وتراجع نفسك كويس قبل ما تتخذ اي قرار…عشان تكون مقتنع بي قرارك وترضى عن نتيجتو…
…….
عندك كم واحد معاك في البيت…امك ابوك اختك اخوك زوجتك عيالك عيال اخوانك…وما تنسى الجيران والاهل والاصدقاء… اتذكر العيان التعبان عشان يتعالج…اتذكر الما قدر يقرأ…اتذكر العيال البطردو فيهم عشان رسوم الدراسة…اتذكر كم واحد طلق مرتو والسبب حاجات ليها علاقة بي عجزو عن توفير الاحتياجات الاساسية من اكل وشراب وكسوة وكهرباء وموية وبيت…اتذكر الناس العزاز عليك الهاجرو سابو البلد عشان يوفروا لي الوراهم لقمة عيش حلال…اتذكر العاطلين من العمل…اتذكر كم عزيز عليك مات بي سبب تدني خدمات الصحة… اتذكر الوسخ المالي الشوارع…اتذكر الباعوض والضبان المالية البلد ومافي صحة بيئة…اتذكر كم مصنع حولك اتقفل وكم شركة وكم واحد اترفد…اتذكر البنات الباعن اغلى ما عندهن عشان ياكلن ويشربن… اتذكر امام الجامعة البياخد راتب من النظام عشان يغش الناس يوم الجمعة…اتذكر كم مرة فرضوا عليك رسوم علي دكانك وكم مخالفة عملوها ليك عشان يملو جيوبهم…اتذكر صفوف الرقم الوطني والجواز واجراءات تغيير الاوراق الثبوتية الما منها طائل…اتذكر تغيير العملة قبل ما حبرها يجف…اتذكر قطعة الكهرباء والموية واتذكر رسومها المبالغ فيها…اتذكر كيف باعو البلد وكيف باعو خطوط الطيران والسكة حديد والمواني النهرية والبحرية ومشاريعنا الزراعية وكيف سلطوا علينا العساكر وناس الامن والمحلية وكيف اتعبوا طلاب الجامعات واتذكر انعدام خدمات الصحة والتعليم والكهرباء والموية والعيش والخضار والهدوم…اتذكر حتى عيد الله كيف بقيت تشيل هم منو بدل ما تفرح بيهو وكيف غشيت عيالك وعيال اخوانك بي شوية دلاقين عشان يفرحو وانت عارف انك بتمشي فيهم بس…اتذكر كيف بقيت عايش علي موية الفول والطعمية وكيف بقيت تستر في حالك سترة… وما تنسى انك ما مجبور علي دا كلو لانو السبب انو ناس الحكومة شالو حقك ادوهو لي اولادهم واهلهم وتاجروا بيهو واشتروا بيهو الاراضي والبيوت والفلل والعمارات وخلوك انت تكابس من الصباح لي الليل وبدون نتيجة…بقيت تشحد وتدين وتلاوي وتسافر وتخلي احب الناس ليك وراك عشان تعيشهم…وبرضو مافي نتيجة..كلما تصبر هم زايدين الطين موية…اتذكر الحروب والبلد الاتقسمت والناس الكتلوهم وسجنوهم وعذبوبهم ومرضوهم وقفلو ليهم ارازقهم…وعاين ليهم معاك في الحي…وفيهم ناس امكن من اصحابك واقرباءك عايشين بي حقك وانت كل يوم ماشي لي وراء…عمرك فات الاربعين ولسه اوضة تسكن فيها ما عندك وهم عندهم قصور…عجلة تتوصل بيها ما عندك وتلقاهم راكبين احسن عربات واخر موديل…ما قادر تعرس وعندهم كم زوجة… عيالك ما قادر تعالجهم وهم بيعالجو عيالهم في الخارج… ولو عاوز قطعة ارض روحك تطلع…لو عاوز ورقة لجنة شعبية روحك تطلع… لو عاوز ورقة او تصديق محلية روحك تطلع…لو عاوز تدخل عربية من برة روحك تطلع…ضرايب وجمارك وزكاة وقبانة وارضية واتاوات ومكوس…
ودا كلو بمشي وين انت ما عارف…بترول وزراعة ودهب وغيرو وكلو ماشي ليهم هم…وانت تشتغل عمرك كلو ليهم…
لازم تتذكر كل شي…وما تنسى شي.
……..
وبعد ما تراجع الكلام دا لو اقتنعت بي العصيان دا فكرتو بسيطة جدا…مطلوب منك تشتري حاجات يوم يومين وتقعد في البيت… لو ما عندك حق اليوم اتدين من صاحبك…اصلا انت عمرك كلو ديون في ديون وما بتفرق معاك لو ادينت لي يوم يومين…ولازم تكلم معاك اهلك وجيرانك واصحابك وناسك عشان برضو يقعدو في البيت برضو… وشوف الما عندو اكل ساعدوا معاك بي صحن ملاح ولفتين كسرة… وخلي عيالك معاك…يعني ح يحصل شنو…ولا شي…
……..
ولو ما اقتنعت بي العصيان دا من حقك…انحنا ما جابرينك ولا بنلاويك ولا بنعمل تخريب ولا تكسير ولا حاجة…ح نلزم بيوتنا…ولو جوك ناس ولقوك براك او لقو بتك او ولدك في الشارع وعملو فيك حاجة ديل ما ناسنا…لانو ناسنا في البيوت…
…….
ومهما كان قرارك لازم تعرف انو موقفك مهم جدا… لانو مصير البلد بقى في مهب الريح ولازم نتخلص من الناس ديل… بعد داك اي مواطن ح يعرف الفرق كويس جدا بين العذاب الاتعذبو في سبعة وعشرين سنة وبين الحياة اللي ح تتفتح قدامو.

علاء الدين الدفينة.