Laa-Laa لا لا موقع شباب السودان الحر
رصد : مهادن الزعيم
✵ طبعا كان في تخوف كبير وكمية تساؤلات (هل الناس ح تقدر تتواجد في ميدان الاعتصام نهارا مع السخانة الموجودة دي والصيام) ودا كان اكبر هاجس لكن الحمد لله الحصل كان اكبر من توقعاتنا …..
✵ صباحا كان العدد الموجود من المعتصمين في الميدان اكبر من الايام السابقة رغم ارتفاع درجة الحرارة وعدم اكتمال الترتيبات بالنسبة للخيم المكيفة …
✵ الناس واصلت هتاف في عز السخانة الصيام ودي كانت حاجة محفزة جدا ومقدمة لصمود اكبر ان شاء الله …..
✵ عصرا بدأت التحضيرات للافطار وتم توزيع الفرش علي طول ميدان الاعتصام بطريقة جميلة ومنسقة …
✵ المواكب بدأت تتوافد عصرا وباعداد كبيرة بصورة غير متوقعة واي زول جاي شايل معاهو حاجة في يدو (موية اكل بليلة بلح) والغريبة كان بهتفوا برضو رغم العطش والصيام ….
✵ ناس الريف الشمالي جو بي نحاسهم (ودقوا النحاس من ضئ في قلب ميدان الاعتصام) حتي بعد كدا وزعوا كمية الاكل الجابوهوا معاهم ….
✵ شباب الخدمات والتوزيع شغالين علي قدم وساق (بس ذي م عارفين جوطة اليوم الاول بتحصل حتي في البيوت) وحاتكون دافع لي مزيد من التجويد لاحقا …..
✵ اذن الاذان وكان الموجود كافي لافطار الجميع والحمد لله لانو اي زول بفكر في الجمبو قبل م يفكر في نفسو (اخلاق الثورة وكدا) …..
✵ صلاة المغرب في جماعة وبعدها هتافات ثورية ومواكب داخلية طافت كل ميدان الاعتصام ……
✵ مشهد صلاة التراويح في ميدان الاعتصام يشرح القلب وبعدها انطلقت الهتافات الثورية مرة اخري من قبل المعتصمين ……
✵ الساعة التاسعة مساء تجمع الالاف من المعتصمين امام بواية البحرية ووقفوا دقيقة حداد علي ارواح الشهداء وبعدها تحية لجنود وضباط البحرية علي وقفتهم المشهودة مع الثوار وبعدها انطلق من ذات المكان موكب ضخم يحمل صور الشهداء تحت هتافات (دم الشهيد لو راح … انا وانت مسؤولين) (ياسلطة مدنية … ياثورة ابدية) طاف كل ارجاء الميدان …..
✵ كل المنصات بدأت فعالياتها مساء بالنشيد الوطني والاغاني الثورية قبل ان تنطلق منها عشرات المخاطبات التي تتحدث عن سلطة مدنية. …..
✵ الحشود في ميدان الاعتصام ليلا كانت كبيرة جدا كأنها مليونية ودي حاجة مبشرة شديد …..
✵ ماحدث اليوم هدم كل التوقعات التي كانت تراهن علي ان الاعتصام سيكون ضعيفا في رمضان واكدت ان لا مخرج للمجلس العسكري الا تسليم الحكومة الي سلطة مدنية …..
#إعتصام_القيادة
#اول_يوم_صيام
