Laa-Laa لا لا موقع شباب السودان الحر
*************
✵ طبعا الناس امس بالنهار اخدت ليها صنة ودا خلي الجداد والامنحية يتجدعوا في الفيس لي ساعات …
✵ بالليل نار الثورة اشتعلت تاني وكان لي #بري نصيب الاسد في قيادة الحراك حرقوا لساتك وقفلوا الشارع لمن ناس الجهاز فقدو المنطق وضربو زخيرة حية ادت الي اصابة احدي الكنداكات (سعاد حامد) لكن دا خلي الناس يزيدو زيادة واستمر الحراك …
✵ ناس #الكلاكلة دايما سباقين برضو طلعو ليل السبت وقفلوا الشارع وهتفوا وغنو وعرضو وخلو صوت الثورة عالي …….
✵ الليلة الاحد من الصباح ناس #الدمازين طلعوا من حي القسم والمدارس واتوجهوا ناحية السوق وانضم ليهم ناس للاشلاق وكان هتافهم (نحن طلعنا ومافي رجوع عشان الناس ماتموت بالجوع) ولم تستطيع الاجهزة الامنية السيطرة عليهم رغم القمع ….
✵ سكان حي. القسم بالدمازين عندما حاولت الشرطة اعتقال المتظاهرين من بينهم خرجوا جميعا في وجه الشرطة ودعموا اولادهم ومنعوا الشرطة من اعتقالهم …..
✵ من #فاشر السلطان التي ابي اهلها الا ان يكون لهم الدور الاعظم والاكبر في الثورة …. ياخ ديل لمن ذلعوا يهتفوا قفلوا الشارع بي لستك بابور عديل كدا …
✵ طلاب #النيلين التفوا حول تحالف احزاب المعارضة عندما قال ان القضية وطن والحصة ثورة والشوارع لاتخون .. فخرجوا الي الشوارع هاتفين فقابلتهم بالزغاريد وزرعت الرعب قي كلاب الامن في قلب الخرطوم…………
✵ الجميلة ومستحيلة جامعة الخرطوم عندما حاصروا السنتر خرج طلاب مجمع #شمبات بالهتاف فحاول البوليس اغلاق الشوارع في وجههم منذ الصباح الباكر لمنعهم من الالتحام مع ثوار #الشعبية لكن انتو عارفين الشمباتة مابوقفهم حصار ولا كجر ……
✵ ي جماعة والله النظام في حالة هلع واكبر دليل علي ذلك الفيديوهات الظهرت امس لي امنجية واحد شايل كلاش والتاني شايل طبنجة وهددو الناس عشان م يطلعوا … اها الحتة اسمها #ام_هلاهلا وغلبهم البعملو …
✵ دا كلووووو هيين المشكلة وردية الليل لسة م بدت … والله الكيزان ديل تعبو تعب شديد والجاي اكتر …..
✵ م فضل حاجة بعد دا نواصل علي نفس النهج
✵ كان الصباح ثوري
والليل مـــــولع نار
صوت الهتــاف عالي
يسقط نظــــام العار
كلب النظـــام يرجف
والمجد للثـــــــوار
