*البرلمان: نسبة الفساد بالبلاد صفر*

╭─┅─═🇸🇩ঊঊঈ═─┅─╮
    📰 *الهـدف*
*دقة الخبر ومسئولية الكلمة*

#الهدف_آراء_حرة

*بقلم: د عمر كبير*           

طيب يا خي ما تدو الرئيس ده خبر بدل تتعبوه بمساككة قطط سمان لا وجود لها لحد ما قلبو يتقطع على الفاضي والبلد فى أشد الحاجة لصحتو.
ادوهو خبر يا جماعة والزول ده شكل مرتين آليات لمحاربة الفساد فى البلد لجنة برئأسة أبو قناية قبل كده وتاااني عمل ليهو محكمة عدييييل وهو المسكين ما عارف البلد (زيرو فساد).
ولا الشكلهم ديل مكاتب لدولة الدوشكنتوش الديمقراطية؟
ودي ملحقيات ملاحقة مفسدين فى دولتهم الشقيقة؟
إنتو ما بتتكلموا من زمان مالكم وناس دخلوا السجون وناس ماتوا فى السجن قبل المحاكمة بتهم الفساد وناس قالوا مرقوا قروشهم برة معتبرين روحهم قطط سمان بسبب الفساد واتغربوا المساكين واتاريهو البلد زيرو فساد، زيرو رغيف، زيرو وقود؟
وأسي الخسائر دي ح يدفعها البرلمان الراقدلو فوق رأي زمنو ده كلو ونحن والرئيس والنيابة والأمن مفتكرين فى قطط سمان من أثر البلع اتاريهو السمنة دي خلعة وخشية إملاق ساي؟
وال قروش (٣٥ مليون دولار ) ال قال أخونا رئيس لجنة الصناعة ما عارفها مشت وين، لقيتو ليها جيهة ومشت فى سبيل الله، ولا عضو برلمانكم ده أخد ليهو نومة زي نومة الجماعة فى قبة البرلمان وكلامه كان اضغاث أحلام ساي ومافي اي كديس هوب ناحية المال العام؟
واخونا المراجع العام ال كل سنة بطلع تقرير فيه إعتداء على المال العام ده كان إعتداء لفظي ساي لا يرقي لمرحلة الفساد لا سمح الله وكان المراجع بتكلم مغبون ساي؟
والخطوط وهيثرو وبصات الوالي والدهب المهرب والمجمر وال كم وسبعين قطعه أرض وال ١٠٠سيارة وسيدها المقبوض بتهمة فساد وخائف (العين) تصيبوا ده كلو مرق حركات من الحكومة ساي ونحن قربنا نصدق؟
والله يا ناس البرلمان الحكومة دي عندها بياخة هزار هههههه؟
تصدقوا نحن المساكين ديل فاكرين الموضوع جد وفيه فساد وانتو اتاريكم يتهظروا مع بعض ساي؟
واخونا المعاكم الاشتري نص أراضي الجامعة ومستشفي الخرطوم وشارع النيل والنيابة طلبت رفع الحصانة عنو وانتو ابيتو ونحن افتكرناكم بتهددوا الدستور وبتعطلو حد من حدود الله اتاريكم راقدين ليكم في رأي وانتو عارفين البلد زيرو فساد؟
والفأر الصغير الاتقبض بتاع الطلبة في حبة مليار كده اتاريهو كان مرسل بيهن ساي وما عليه فساد؟
انتو ما بتتكلمو مالكم والمحاكم بتحاكم في ناس شركة الأقطان ولو القاضي سخن نفسو شوية كان حكم بالإعدام على وأحد فيهم وانتو تتكشموا ولابدين؟
وانتو ما بتتكلمو مالكم يا جماعة ونحن والرئيس والأمن والنيابات والمراجع العام نشيل ونساكك فى القطط السمان بيت بيت وزنقة زنقة وانتوا تتكشمو زي نار القصب وعارفين مافي فساد وما كلمتونا؟
وبالمناسبة يا برلمان أول أمس دي الناطق الرسمي نطق (أحمد بلال) وقال ال حملة شغالة ولن تتوقف إلا بعد نضافة السودان من الفساد ف انتو ك ناس حكومة ما قاعدين تتونسوا ونسة ساي مع بعض عشان تخففو لينا شوية الشيزوفرينيا دي؟
ولا البمسك المايك الأول بقول ال في راسو ويمرق؟
ولا كلو هظارات؟
عليكم الله تاني ما تهظروا هظار عوير كده أسى لو الحكومة دي اعدمت الكدايس ولا جلدتهم ولا قطعت ليها يد وأحد تقولو لي ربكم شنو يوم القيامة تقولو ليه كنا بنهظر ساي وانتو اهل الجلد والرأس والشوري؟
أنا شخصيا لو كنت رئيس جمهورية بعد تصريحكم المنقول ده لو ما نفيتوه بحلق للبرلمان ده كلو صلعة زيرو وتبقي البلد زيرو فساد زيرو شعر برلمانيين زيرو مسئولية.
نحن عرفنا الحمد لله ألحقو الجماعة ديلك كلموهم قبل ما يسافروا.
زيرو برلمان
زيرو حكومة
زيرو ذمة

*ونحن شعب أوسطى.*

________________________

*▪العصيان المدني طريقنا لإسقاط النظام وإقامة البديل الوطني الديمقراطي*

*▪لا سلطة لغير الشعب ولا وصاية على الشعب.*

*ﭠَڝَـدَرَ عـنَ حِـۤـزْب الَبعــثَ الَعـرَﭜَـيَ الَاشـَـﭠَرَاكَــيَ*
❇════════════❇

لِلِمِزِيِدِ مِنِ الِأخِبِارِ تِابِعِوِا *صِفِحِتِنِا عِلِےِ الِفِيِسِبِوِكِ:*

https://m.facebook.com/hadafsd/

*على تويتر*
https://twitter.com/alhadaf_albaath

*على تيليغرام*
t.me/alhadafsudan

*على +Google*
https://goo.gl/GHyXbc
╰─┅─═ঊঊঈ🇸🇩═─┅─╯