خصوصيات سودانية

يا ماري بركشة هواي
امجادك  القبيل حداي
كانون السرور ذكرى
ومجلة صباحك معاي
عمك تنقو والسراي
يا السراي
جافوا النوم باعوض
خريفنا  نوناي
المطر هطل كركب
زنكيك بنقز
صوت سباليقك
ناي
حبوبة المطر زغردت
والكمبليتا لعبة
صباي
ام الحفر والحجلة
اريكا عميا يا بنوت
حلتنا تعالن جاي
سكجنا  بكج هداك
قرقورنا دور فوق
يداي
دسوسية وسك سك
ديك حلتنا
عوعاي
دافوري الحي الكان
وكافوري الان
فيها من  اذاي
المابتلحقو جدعه
ميدان عقرب
قاعد جواي
أميرة قالت
بالكفتيرة ربيت
عيال حشاي
برد برد ترمس
.كبكبي في جردل
مناي
كدس ام دلدوم
في ضهر الخنق
بي عيشاي
لا شوت ضفاري
كراعك مشققة
يالابس شدة
خريف وشتاي
بتشيل خبيز
العيد صواني
وطابونة الافراح
نارها سرمد وفاي
عومة بحر تبدد
حزنك الساي
حريرة في ايدك
وهلال فوق جبينك
الضواي
عروس وجدلة
ماضيك ولى
موعود بي بركات
الفرح عشية
ياللداية اكلك
ذاد هناي
سخينة مباشر
ما بباري يالفسل
بسافر انا
براي
ما تروقوا المنقا

ديل نحن
ونحن البيتنا
من طين وفيو
راكوبة اصلو
ما اشتكى من
خريف
ومتسلق راكوبتنا
ليف
جنبنا حبوبة
بتعوس
في حريف
والدنيا صيف
الرملة في
غرفنا مرشوشة
وجبنتنا كيف
شفعنا فرحانين
عشان سفنجات
جديدات نيف
جدو معاهم
لابس عراقي
شغله التحت
في الجريف
شجر نيم
حلتنا مخضر
ووريف
مطرة امبارح
الجات
رشت
رش خفيف
فاطرين نحنا
سخينة
مع
ملاح روب
لطيف
عناقريبنا يا
البتشيلي
الضيف
جدادنا حايم
وديكنا سكاك
بنقد نقد
طفيف
ديك سخلات
ومعاهم عتوت
ظريف
كلبنا راقد
في الحيط
اصلو بالليل
تمساحا
رقد في القيف
كديسنا
عدمنا ام سيسي
والجقر قراض
الرغيف
اهلي الحنان
تشيلكم العافية
انتو ما بتعرفوا
الزيف
قريبا نعود
كما كنا
واحلى من
الوان الطيف

سامح الشيخ