*مأساة طفلة اسمها حُرة باخت*   *رايحين في لب الطلحة*

╭─┅─═??ঊঊঈ═─┅─╮
    ? *نشـرة الهـدف*
*دقة الخبر ومسئولية الكلمة*
#الهدف_متابعات

*أجرت الحوار باللهجة البدوية وعلقت عليه: غادة الحاج*

تنويه: “لهدف” تنشر هذه المادة لعمق دلالة مفرداتها وصدقها وبساطتها وبين الأقواس تحاول تقريب المعنى الذي ربما أرادته والدة الطفلة، وتستأذن صاحبة  الحوار بالنشر.

وأنا بسأل أم حرة: انتى كيف؟
والدة حرة: طيبي بِطم {بت أمي} والناس هناك جهة ابو كدمة، خبورهم شنو؟
والدة حرة: ناس يين {وين} الفريق بقي خاااااالى.
.وانا دمعة فى عيني ما فضلت على حال طفلة، انتو عارفين انو ام حرة ذاتها مثل الطفلة، تقطع القلب قاست أقسي اللحظات. موت زوجها وضرب ابنتها الرضيعة وقتل والدها وشقيقتها التي جاءت للوضوع عندهم.

قالت والدة حرة” لما ابونا إنضرب كان بروحا {بروحه،بمعنى أنه لم يمت} شِلت البطانية كفيتا فوقا،{غطيته بالبطانية} علشان ما يأمنو
وبعداك جاء واحد منهم، شال البطاطين والهدوم والحمير سرقكن ..كن {لو} فى راجل فى الفريق كان بقتلا {يقتله}لانه انقطع من رفاقتا{رفاقه وأصحابه}

وبتسألنىي ام حُرة : بي شوفكِي بتطم، بتي دى حالا  بتقى كويسة؟{حسب اعتقادك يا بت أمي هل سوف تتعافى ابنتي؟}
قلت ليها: واي بتقى، هى حالا ماها طيبة الا العين،  ودا القدر احمدي الله{ نعم سوف تتعافى وهي الآن كويسة وعينها فقط هي المصابة}
قالت:  حامدي {أنا حامدة الله}
الناس دما{لمن} جونا قالو لينا حالتكو دي زي حالة خراب الدوسة العمومية هن عيال صهيب {بتاعة عيال صهيب} فريق كاامل كتلو جنقي{تقصد أن جانقي قتلوا كل الفريق}

قلت ليها: انتي من هناك جيتي بشنو؟
قالت: انا دما{لمن} لقيت بتي بروحا{ما زالت حية} خمشتها قبال ما يدفنوا الناس، قل ليهم{قلت لهم} بمشي بعالجا {أعالجها} فى واحد من اعمامها جاء معانا ركب العربية لبُكان {مكان} بقولوا ليه{يسمى} بليلة  ومنا{منه} ركبونى الطيارة،عمري كلا{كله} بسمع بيها سمع، ركبتها.

شفتوا بساطة زى دي وبراءة
قلت ليها: عشان حرة، ركبوكي الطيارة،بتكِى{ابنتك} دى كان{لو} الله خلاها ليكي بتقى {تصبح} دكتورة وبتعالجكِي هى زاتا {وسوف تعالجك هي نفسها}
قالت: ااي يين دارا {أين بلد ذلك؟،بمعنى ان ذلك لن يحدث}البعلمها لي اتو؟.{من الذي يقوم بتعليمها؟}

آااخ انا من أطفال بلدي ما عندهم وجيع ومن أمهات صغيرات فى عمر الجامعات يا حيفي عليكن.
انتو عارفين انا قلت ليها انتى المفروض تكونى فى العِدة قالت لى العدة دى شنو؟ قلت ليها دا الحبس، المرة لما راجلا يموت بتنحبس. قالت لى واى عمتي قالت لى تنحبسي، نحن العيين{النساء} علينا {في جهاتنا} بنحبسن ٤٠ يوم!
قلت ليها انتى هسي عندك ظروف لكن كان{كمان} ما تصافحي، وتتبلمي بالتوب لحدي ما بنتك حرة تبقى كويسة وترجعي البيت.
وقلت ليها حبس المرأة لراجلا أربعة شهور وعشرة يوم
قالت لى: كِني{كل} ناس بعادتم {عادتهم}
غصباً عني ضحكت قلت ليها دي ما عادات، دا كلام الله، ابتسمت
قالت: نحن رايحين سااكت في لُب طلحتنا دي.

حرة وأمها الطفلة، الاتنين مآسي حقيقية حرجمنى وقفلن بالعبرة حلقي وخلني يومين مابية  الاكل.
شفتو حالنا كيف؟ يا متعلمين
يا مثقفين، يالعليكم ناس الخلاء متكلين.
مآسي جوة مآسي بالجملة  ويابلد حالك واااااقف وما ماااااااااشى
ابدا الحال ما بسر
ام حرة بتقول كأنها بتونس روحا  البقر قالوا رجعوهِن، بقر بلا سيدتِن{مالكها} شن بسوهِن! مال بلا سيدا بسوا شنو؟ تدمع عينها.

أم حرة مافي البعزيها 
أم حرة شافت هوايل وهى صابرة الحمد لله وقوية. سبحان الله
بلد حالا حزين، وناسن حالا زين، وناس عايشة المآسي
ولا بواكي عليكم يا أهلي السايرين
لا بواكي.
_________________________

*ﭠَڝَـدَرَ عـنَ حِـۤـزْب الَبعــثَ الَعـرَﭜَـيَ الَاشـَـﭠَرَاكَــيَ*
❇════════════❇

لِلِمِزِيِدِ مِنِ الِأخِبِارِ تِابِعِوِا صِفِحِتِنِا عِلِےِ الِفِيِسِبِوِكِ:

https://m.facebook.com/hadafsd/

╰─┅─═ঊঊঈ??═─┅─╯