*ادعموا صوت غناكم وردي الصغير*

أطلقوا سراح الفنان وردي الصغير
أطلقوا سراح كل المعتقلين
أطلقوا سراح الوطن

 
شوفو يا شفوت ويا أهلنا
والله جد الجد  الوطن بيكم زينة 
ومن حبكم ما اكتفينا
ومهما مشينا ومنكم بعدنا  تلقونا 
تاااااني جينا  
تبقوا انتو الدنيا كلها
وفيكم وبيكم  تتحقق امانينا 
اها عايز اقول ليكم شنو يا ربي ……
 لما أجهزة الأمن التابعة للدولة
الفاسدة دي تختطف فنان وتختو  رهينة عندها
وفي نفس الوقت الفنان ده  لا شايلو عصاية لناس المؤتمر إللا وطني  ديل لا رفع ليهم سلاح ولا نفذ ضدهم عملية انتحارية زي ما بتعمل الجماعات التابعة ليهم
كل الشي العملو  انه انحاز ليكم ووقف في صفكم 
وقال زي ما كل الناس قالت وقاعده تقول .. لا للغلاء
 لا للفساد
لا لسياسات تركيع  الشعب واذلاله 
وكان حاضر بيناتكم في 16 يناير يدافر  ويعافر  زيكم 
يناهض  ويثور  في وجه اوباش السلطة الهمجية الفاقدة  لأي شرعية
ولأنه ما وقف بين بين ولا عمل فواصل وساتر  بينكم
واشترى السكات  بالمسارح  والكهارب  والبهارج 
عايزكم تعرفوا وانتو اسياد العارفين
لما  يكون الفنان مسؤول وليهو قضية ما بتنفصل من قضايا شعبو ووطنو زي وردي الصغير المختطف حتى الآن رهينة في قبضة أجهزة الأمن وكل جريمته
غناهو الهادف وطاعم 
المدرسة فاتحة على الشارع
والشارع فاتح في قلبي
انا قلبي مساكن شعبية
يبقى الفنان هو ضمير  للأمة وممثل شرعي لاحلامها  وتطلعاتها وعشان الحتة دي بالذات بتعاديهو الاجهزة الامنية   وزي ما السلطة بتعتقل  القيادي السياسي والناشط في حقوق الإنسان والقانوني النزيه  والإعلامي الحر يبقى كان لابد ان تخطف  وردي الصغير وتكتم صوتو 
وانحنا يا شفاتة ويا أهلنا لازم  يكون لينا كلمة وموقف
وصرخة  في وجه الظالم المستبد اطلقوا  سراح الفنان المبدع وردي الصغير وكل المعتقلين الشرفاء
ولابد يكون لينا رأي في المغنواتية  الساهمو في محاولات تخريب المزاج السوداني بالأغاني الهايفة  واغنيات  داعمة للعنصرية ودق  طبول الحرب والموت  الكوماج يوم دور  وغيرها من الأغاني الخمج ديل نسو  انو انحنا غنى  لينا كرومة  والخليل وعثمان الشفيع والعميري  ومصطفى سيد احمد والهامة أبو عركي البخيت
يعني وجدانا البحمل بصمتنا  وملامحنا عصي على التشويه  مهما حصل من تلميع وصخب وضجيج في زمن إعلام الغفلة
فلنردد  كلنا
اطلقوا سراح شرفاء الوطن
اطلقوا سراح صوت إلهام  الشعب السوداني
وردي الصغير
ويلاكم نردد كلنا
انحنا جيناك يا بلد يعتقل  فيها وردي  الصغير وبعرض  على مسرحها  عوض شكسبير?
وما طالبني  حليفة إلا دحين مش مفروض نقول  الاسم سالم هههههه 

*ثورة ثورة حتى النصر*

*?زول شفاتي?*