شــيـنة منــك !!

شعر : خضرعطا المنان
بيكا ربنا ابتــــلانا
والبلد قللت شــــانا
وشلتا  حسنا  يا( فطينة )
شيــنة منك والله  شيــنة ..

سايحة ركبك في المفاصل
وانت لى رقصك تواصل
وماك راجلن حاسي  بينا
شينـــة منك  والله شيــنة ..

يا الخروف  الباقي  علة
تــيس  وحايم فيها  حلة
قـردة ترقص في جنينة
شيـنة منك والله  شيــنة ..

ماخلاص بالجد  كفـاك
سوق عصابتك والمعاك
خــــافو ربنا مرة فيــنا ..

انت يــالراقص دوام
شلتا  حــسنا  للانــام
وحــلوة ماخليـــتا فيـنا 
شـنية منــك والله شيــنة..

كم رجال باعت  ذمم
والحثـــــالات والرمم
اضحو في حزبك رهينة ..

اختشــي  وســيــب البــــــلد
عشنا الشتات من دون عدد
والمهاجـــر فايـضة بيــنا .. 

ماخــلاص طلعتو روحنا 
عشـنا نلعـق في جـروحنا
ومن عمايــــلك اتهـــرينا
شــينة منك والله شيــــــنة ..

يــاما بالنــار  اكتويــنا
من  مخازيــكم رويــنا
وفينا  سـوت غرغرينا..

البــلد مليــان دعـــارة
واصبح الاسلام تجارة
والملايين مفســــــدينا
شــينة منك  والله شيــــنة ..

ضقنا ويلات من (جلالكم)
وانتو سادرين في ضلالكم
ونحنا في حفــرة اتـرمينا  ..

انتو ساكنين في قصور
والملاييــن في جحور
تنادي : ربنا حن علينا
شيــنة منك والله شيــنة ..

جيــتو لميتــو القـروش
نعـمة ربيــتو الكـروش
ونحنا ناكل في (السخينة)..

اصلو اســلامكم خديعة
وانتو شــوهتو الشريعة
والرسول صادق  نبيـنا..

حيرتو  ابليس في زمانو
والبــــلد فاقـــــــــد امانو
وفي الوحل سمعتنا طينة
شينة منك والله شـــــــــينة ..