*خجلان عشانك يا تراب*

? _*الهــدف.tt*_ ??
#آلُہــڊف
#الهدف_ثقافي

                  *حسن بكري*

وأنا زول مكفّن بالوعود
الونسة والضحك الهزار..
العدسة بتصور سقوط النجم
وأشعار مومسات
الدم في أنصاص الكبابي
وبدلتين..
وقميص شهيد
والخوف سكنْ كل العيون
والناس بتبكي من الضحك
إحساس مريب!
ياخ وين رجولتك يا طريق؟
أو وين أنوثتِك يا نهارات يا سجم؟
وينهم شعوبك يا شهيق؟
وين أي حاجة وأي شي؟
وين الصباح؟
وين الصغار ضنب الحصان؟
وين المآذن من موات الحق؟
وليه مات الفلاح؟
وينا القصيدة التلهمك؟
تهتف..
وتديك البراح
وين القوافي التستحق ينزل عشانها الوحي
مفرود الجناح؟
وين الله من هذي الأيادي الداعية
بالليل والصباح؟
وين الحقيقة؟
ووين غناك يا عركي راح؟
حردان أبوح..
مكسورة عيني قصاد شهيد..
الصوت ملامحو شروخ.. شروخ
خجلان أقابل طفلتي
وخايف أبوس إيد أمها
والأمن برصد في الحنين..
والنشطاء أولاد الظروف..
أحزابنا أبْوات الحرام..
الشعب مشغول بي الفطور
والثورة في الواقع كلام
بوستات تمارس عهرها
وتقذفنا لايكات والسلام..
مات الله جوات القلوب
لا دمعة نزلت غطتو
لا نعي في صحف النظام
لا حاجة واحدة بتوحي ليك
إنو النظام ما بشبه الواقع
وبتنافر معاو..
خجلان عشانك يا تراب
مليان أسف!
جيت أشكي ليك
واشتكيك..
جيت أعزلك..
وأستأذنك
إنو الغبار بشبهه خطاوينا
وبيشبهنا النحيب..
مغبون قدر
ما يومي في دارفور
بيُنتهك الصباح..
فتران قدر
راح الصلاح
رايح قدر
ما الحلم راح
باصق في وش كل البيهتف بالنهار..
وبالليل بسوي سلام سلاح
آسف!
بريءٌ أنا من سخفكم وصمتكم
ما إنتو شعبي
ولا بفرز كلكم
خنتوني مع هذا النظام
سبتوني فاكرين إنكم
بالونسة حتكونوا الصدام
ذات الشوارع الما بتخون
مات فيها هزّاع
جرتوا البت الحديقة
ودنسوا الخوف اللعين
تباً لنا!
تبً لأمواتنا اللي راحوا
وللي حيين
واللي لسه في عين حبيباتكم حلم
تباً لأجيال الشفوت
للهم وأحزان البيوت
للفرحة كيف يومي بتموت
للنَوبَة.. دق الطّار
وللطارة وكبابي العرقي
لي هذا الحنوط
لي ضحكة ناسيها الطريق
خيّم عليها العنكبوت
لي كل بوكسي وكل مناضل وكل بوت
تباً لحرفي الكلما كممت خشمو
رجع يجوط
آسف!
بريءٌ أنا منكم
يا شعرا
يا شعب القصايد الزيف
أغانيكم أسف
ياكل صامت
ساكت الحق في جواك
يوماتي بتبيع الحقيقة
بفضلكم بقت القضايا خشم بيوت
من شرقها
ولي غربها
بي نزفها وعاهراتها وأولاد همسها
حاسّي البلد حقت أبوي
مجبور براي
مجبور أضمّد جرحها..

*ﭠَڝَـدَرَ عـنَ حِـۤـزْب الَبعــثَ الَعـرَﭜَـيَ الَاشـَـﭠَرَاكَــيَ*
❇════════════❇

لِلِمِزِيِدِ مِنِ الِأخِبِارِ تِابِعِوِا صِفِحِتِنِا عِلِےِ الِفِيِسِبِوِكِ:

https://m.facebook.com/hadafsd/

????????