في تشويش شديد في اذهان عدد كبير من الناس بخصوص موضوع الحوار

ثالثا : هل تم تجريب الوسيلة دي …ايوة .. وعشان نتكلم عن نفسنا اول ..حزب الامة قعد ومضي مية ورقة مع الانقاذيين … جيبوتي ،التراضي الوطني ، اهل السودان … دا غير محاولات كتيرة جدا بذلها الحزب عشان يخلي الوسيلة بتاعت الحوار دي شغالة ،لكن بلا فايدة ..بل بالعكس .. القصة دي جابت مشاكل لحزب الامة ..اذ سعت الانقاذ لتحطيم الحزب .. واخراجه من الساحة السياسية بالكااااامل ..واستخدمت لذلك كل الطرق الممكنة ..ودا طبعا اقل ما يوصف به هو انو عفانة !

رابعا : هل في زول جرّب الوسيلة دي غيرنا ? ايوة ..الحركة الشعبية ..كانت النتيجة انفصال الجنوب … وفتح نيران القنابل والجوع علي مناطق وجود قواعدها … !
تنظيميات دارفور .. كانت النتيجة … مزيد من القتل والتشريد لسكان دارفور … مزيد من النزوح ..السودان هو الدولة الرابعة عالميا في النزوح الداخلي !

المناصير وناس دال … 29 شهيد .. والقرف في قرفو !

الشعبي … جرّب الحوار سرا وعلنا .. في النهاية مشي عدييييل الحوار بتاع القاعة … كانت النتيجة شنو ..18 توصية اختفت من ورقة التوصيات … ياتو توصيات الاختفت .. ? التوصيات الخاصة بالحريات وجهاز الامن ووضع البشير … والشيخ آخر ايامه التقي مسئولين رسميين رفيعيين ..وقاليهم كدا ..وانو دا كدا ما بنفع معانا … ورئيس لجنة اسناد الحوار ..عندو تصريح شهير : الآن انعي لكم الحوار الوطني ..اها فضل شنو ..عشان الحلقة تنتهي .. فضل يتعافنوا مع الشعبي … ونكون كدا ..كللللللنا … جرّبنا المجرّب ..وحاقت بنا الندامة …!!!

خامسا : هل العملوهو دا …خلانا نشيل السلاح ? خلانا نكفر بنجاعة الوسيلة ? … ابدااااا .. لكن ما ممكن نستخدمها بنفس الطريقة الفاتت … قلنا عشان الوسيلة دي تشتغل وتجيب فايدة ..ضروري يكون في حريات ..ويتعطل قانون جهاز الامن ..ويفكوا المعتقلين والحاكموهم جور .. ونوقّف اطلاق النار ..ونفتح ممرات اغاثة للقاعدين تحاصرو فيهم بالجوع ..والبحاول يطلع ..تقصفوهو بالقنابل !

سادسا : الشروط الفوق دي ليه ..دا عشان نضمن انو الوطني داير حل ..ودا عشان ما نكرر غلطاتنا تاني ..موش الاحسن الزول يتعلم من اخطائو ..ويصلحها ? ..موش السيرة بتاعتكم الفوق دي بتخلي اي زول مدّ ايدو يصافحكم ..يعد اصابعينو ? موش كفاية الوقت الضاع ? موش كل مرة ندخل فيها في حوار معاكم ..كنتو بتستغلو الفرصة عشان ترتكبو مزيد من الجرايم ? موش اي تجربة حوار ..انتهت بأذية الزول الجاكم ..واذية المنطقة ..واذية القضية كلها …موش دا الحصل ? ..شنو المشكلة انو نخت شروط تضمن دا ما يتكرر ..شنو المشكلة ? لو انتو عاوزين مصلحتكم وبس ..حترفضوا الكلام دا ..لو انتو جادين ..حتقبلوهو ..ودي اظن ما دايرة اثبات …!!!

سابعا : في ناس قاعدين يقولو لينا …الشروط دي شروط منتصر .. وانتو ما منتصرين ..تمام ..طيب الوطني ساكينا ليه ? ليه النظام واهلو ساكي الناس بالحوار دا ? ..لانو جرّب الموضوع دا واداهو عمر وحياة جديدة ..استخدمها في القتل والسحل والحرق والاعتقالات والتهجير بره وجوة ! يعني الوطني منتصر كيف وهو ما لاقي ياكل ومهزوم عسكريا وخايف ومهزوز ومبهدل … الاّ اذا كان بتعتبروا البقاء في السلطة بغض النظر عن التمن ..انتصار !!!

ثامنا : وفي ناس بقولو لينا ..وقت الوطني يقبل الشروط دي ..تاني الفضل شنو ..ما يفوت وخلاص … !!!
دا كلام شنو دا ..كيفن فضل شنو .. فضل كيف نفكك الدولة العملها .. فضل كيف نرجع القروش الاتنهبت .. فضل كيف نتحاسب علي الدم … فضل كيف نتحاسب علي انتهاكات حقوق الانسان … فضل نحدد وضع ناس الوطني زاتم … فضل كتييير ..موش انتو الماسكين السلطة هسع … ?!

تاسعا : الناس الدايرين الحوار .. من غير ناس الحكومة …ومن غير الانقاذيين ..مقسومين مجموعتين ..مجموعة خايفة جد جد من آثار هبّة شعبية ثائرة … وديل انا دايرهم يسألوا نفسهم سؤال …ليه انتو خايفين ? ما الشعب دا عمل ثورتين قبل كدا … حصل شنو يعني ? … حقو تسألو روحكم … انتو خايفين كدا ليه من ثورة شعبية ? لانكم عارفين انو حجم الجرائم ضخم ..وانو حجم الغبائن عظيم .. طيب ..العمل كدا منو ? موش ناس الانقاذ الانتو بتقولو لينا امشوا اتحاوروا معاهم ..? طيب ديل حيقبلو كيف حوار نتيجتو تخليهم في السهلة ? هو انتو ..الما عملتو كدا ..انا قاصد مجموعة الخايفين من تداعيات ثورة شعبية .. اذا كان انتو ما عملتو الجرايم دي خايفين .. فما بالكم بالعملوها ..????!!!! … ماااااا حيقبلوا اي حوار ..الا تكون نتيجتو ..استمرارهم في السلطة …!!!

بعدين القال ليكم منو ..مافي خراب هسع ? ..انتو قايلين السودان دا الخرطوم ..وبس … عارفين دارفور فيها شنو ..عارفين الشرق فيهو شنو ..عارفين جبال النوبة فيها شنو ..عارفين وين سودانير والبحرية ومشروع الجزيرة ..عارفين التفكك الاسري وصل وين ..عارفين ( الدين ) ..كان اسلام ولا غيرو ..وضعو كيف … عارفين انو الهاجروا من السودان من يناير لغاية اليوم 43 الف …عارفين في كم بت معتقلة ..عارفين في كم طفل بتكتلوا طيارة الحكومة …هو المافي شنو …!!!

هل انتو عارفين ..علي ماذا تُغلق ابواب البيوت في الخرطوم دي زاتها …هل انتو عارفين ..كيف تستر الحيط …جوع الناس ..داخل بيوت الخرطوم ..

هل انتو عارفين ..كيف يقاوم ناس الخرطوم الجوع …الخرطوم الانتو فيها دي زااااتها …عارفين …????? !!!!!

المجموعة التانية ..البتقول حوار حوار … هم الناس اولاد عم الانقاذيين عقائديا ..او قبليا ..او .. أُسريا ..لكن هم ما انقاذيين وما عملو جرايم .. لكن ..لهم من الادانة نصيب … فالصمت نفسه جريمة … وديل انا دايرهم يفهموا حاجة واحدة بس … الملك ما دائم ..والسلطان منزوع وان طالت سلامته …وفي اليوم داك … حيعتبروكم معاهم ..اكان ما عديل … باللفة …حين يصيبكم ما يصيب اعوان الظلمة … احسن تبعدوا من راس الحمار !

اها ديل …المجموعتين ديل ..لو صحي خايفين علي مصلحة البلد .. الصادقين منكم ..او ..اهل المصلحة … فاحسن تمشوا تضغطوا البشير وجماعتو … لو صحي دايرين تعملوا حاجة تانية غير الكواريك في وشنا بعد كل ( جمعة مباركة ) … وقبل كل ( تصبحوا علي خير ) …!!!

عاشرا : في ناس من الجماعة الفوق ديل ..امّا يعارونا ..انتو ما عندكم حاجة ..وانتو ما عندكم خيار غير الحوار … وامّا يهددونا … الا يا خيل الله اركبي … ويا ناس المكاتب الخاصة وينكم ..ونحن قادرين علي حماية الاهل والعرض والممتلكات

اول حاجة في خيار تاني اسمو الشارع ..امشو احسبو نسبة الناس البقو يقولو الشارع … احسبو الزيادة من 2009 وحتي الآن … لو مفتكرين ديل ناس المعارضة المنظمة بكل تشكيلاتها . فانتو غلطانين ..ولو قايلين الشارع كلوووو ملك للمعارضة ..فانتو غلطااااانييييين … الشارع اكبر بكتير من المعارضة ومنكم …مجتمعين …الشارع اعرض .. و كل يوم ماشي يستع ويبقي عريض … وهسع بقول ليكم ..احنا ماشين الشارع ..ودا خيارنا …

دا خيارنا … !!!

وامّا جماعة التهديدات .. فالعوارة دي لا نجّحت الانقاذ ..ولا زادت تأييدها ..ولا  منعتها الفشل … ولا كسّبتها مناصرين … و لن تحميها من السقوط ..هي وانتم وتهديداتكم … !

كل حاجة جربتوها ..القتل ..الاعتقال …التشريد ..النهب ..التضييق علي الارزاق … التهجير … التعذيب ..الفصل من الخدمة … التعيين بالولاء … اي حاجة جربتوها ..اها يعني عملتو شنو ???

الفشل الفيهو انتو دا … فشل آلهي …الفشل الانتو فيهو دا ..توفيق آلهي … لا يتوفر الاّ لامثالكم … ان الله لا يُصلح عمل المفسدين … و س … يُيسّركم ..لعُسراكم …!!!

قبل ان تطلقوا تهديداتكم … عاينوا في المراية … عسي ان تفرزوا …

جسمكم الحقيقي …  من ورم الاوهام !!!

حداشر :

لا حوار … خيارنا الشارع …

الكلمة عند الشارع …

تمشي عليكم ..و علينا …

الكلمة عند الشارع … !!!