طفل في عمر الرضاعة برضو خوفو من الجماعة

طفل في عمر الرضاعة
برضو خوفو من الجماعة
يكبر مايحقق حلم
تكبر اوجاعو معاهو
وخوفو بكرة يشيل اساهو
ويجرب احساس العدم
هو كان بيحلم بالسلام
بي وطن فيهو احترام
بي حكومة تغني ليهو
وبرضو تديهو اهتمام
بي حكومة ليهو ترسم
لوحة مستقبل معافى
تنسيهو ماضيهو المعفر
بالفظاعات الي شافا
طفل عايش في حلم
انو يكبر يشوف عروسة
حلوة امورة وحسيسة
تضوي ليهو طريق حياتو
ومعاها ما يعرف العدم
اصلو في عمر الطفولة
راضع من امو الرجولة
صارة في قلبا وخجولة
شايلة تصميما وارادة
انو ماتعيش الوهم
رضعتو كل الشهامة
وكيف يعيش في استقامة  إلأ خافت انو بكرة
مايقع ليهو الفهم
بس عارف كل حاجة
حاسي بي كل المواجع
بي كفاح شعب مغلوب 
وجايع
وخدعة الدين الكبيرة الخلتو شعب راكع
طفل في عمر الشفاعة
بتخلع وكت الرضاعة
كان بيسمع صوت رصاصة ودانة في راس كل ساعة
طفل ماعاش البراءة
في وطن كان واتهدم
طفل عاش الشقاوة
بحلم تتشال الغشاوة
عشان يعيش العاب طفولتو
بي سعادة بلا ندم
طفل بحلم انو يقرأ
يكبر يلقى ماهية الوظيفة
عشان تكفي حق رغيفة
طفل برضع
وبرضو بحلم

بريدك يا سودان .