Laa-Laa لا لا موقع شباب السودان الحر
تقريباً أي زول بيعرفني عن قرب عارف انه واحدة من مسببات التروما عندي حرس جامعة الخرطوم والليلة خلاص طفح الكيل والتروما بقت غضب حيتحول لي أفعال.
الإدراك دا وصلت ليه لما الليلة السيّدة الحرس في الباب ما بس منعتني من الدخول رغم إني وريتها ورق بيثبت إني محاضرة في كلية العمارة، بل وقررت إنه لازم تسوقني من يدي من البوابة للكلية عشان تشتكي للعميد إنه الاسكيرت الأنا لابساه ما عاجبها. في عز إنفعالي معاها قلت ليها “أنا مشكلتي ما بس معاك، أنا مشكلتي مع النظام الإنتي بتمثليه”، وفي نفس اللحظة أدركت إني لازم أسعى إنه النظام البيسمح بي إهانتي أنا وزميلاتي النساء في جامعة الخرطوم يتغير، سواء كانت قوانين أو لوائح أو سلوك أفراد.
تعديل: مرفق صورة للبستي “غير اللائقة”. ما كنت عايزة أنزلها لأنه أبداً ما بيفرق أنا كنت لابسة شنو، الحصل دا من حيث المبدأ غلط. لكن يمكن تساهم إنه تشرح قدر شنو وصف “غير لائق” دا فضفاض.
تسنيم ناجي محاضرة بالجامعة
