شاهدة_عيان_علي_احداث_الغدر_في_القيادة

–  كنا ماشين القيادة اناوآمنة و ستو وحمودي نحضر خطاب أسر الشهداء لما وصلنا لقينا العساكر قافلين الشارع من بعد مستشفي المعلم وبرجعو في الناس لما سألتا واحد من الشباب الطالعين قال لي ام الشهيد مطر القت الخطاب وناس الجيش بدو يطلعو في الناس خلاص

– رجعنا شارع النيل لما قربنا علي كبري الحديد ابتدينا نشوف الثوار جارين والعساكر مطاردينهم و بعداك بدينا نسمع صوت ضرب رصاص
ف بقينا مسرعين لانه معانا طفل في العربية
لما وصلنا جمب جامعة الخرطوم بقو العساكر بعتقلو في الثوار ولما يقبضو واحد يتلمو فيهو خمسة وستة بضربوهم ضرب ما طبيعي بالخراطيش والدبشك بتاع الكلاش

– نحنا كنا متجهين علي امدرمان لما وصلنا نفق جامعة الخرطوم العساكر قفلو الشارع و قالو لينا لفو و ارجعو  ورجعنا تاني
و لما وصلنا جمب إذاعة القوات المسلحة زي الساعة تسعة كدا بعديها ب مسافة بسيطة سمعنا صوت رصاص تاني وبعداك انا شوفتا الشهيد عثمان واقع في الارض وقفنا العربية ونزلتا بقيت بكورك للناس انه في ولد مضروب في ولد واقع  الناس كانت ما بتقيف بعداك سمعونا ولدين جو و شالو عثمان و مشو بيهو مستشفي رويال كير

– وصلنا وبقينا مستنين علي أعصابنا لانه لما كان واقع كان قاطع نفس و مغمي عليهو اصعب لحظات مرت علينا حاولو يسعفوهو لكن ياحليلو هو كان نزف دم كتير واستشهد في الحال

– الشهيد عثمان كان في شارع النيل ولما حصل ضرب الرصاص طلع في الترتوار عشان يلف ويرجع العربية غرزت في الترتوار و نزل عشان يشوف العربية واتقنص في اللحظة دي من دون اي ذنب

بعداك دخلنا في حالة هيستريا وبقينا ما مستوعبين الحصل دا شنو وحصل ليه

– عمة الشهيد عثمان وصلت المستشفي  وهي في حالة صدمة شديدة لانها كانت بتقول فطر معاها وطلع من البيت كانت بتقول  كيف يكتلو عثمان  ولدي الطيب الحنين الجميل ولدي الشاطر الطموح مستنين تخريجو فضل ليهو سنتين ويتخرج طبيب و عاوز يسافر يتخصص برا

– بعداك جابو الإسعاف يشيل الجثمان وعمته اصرت انه اركب معاها في الإسعاف عشان أمشي النيابة وأشهد هي كانت خايفة انه مانمشي نشهد لكن هي بعداك فهمت انه عثمان الماعرفناهو الا بعد مات بقا اخونا وحبيبنا وحتة من روحنا و وجعتنا وكسرة قلوبنا عليهو ما اظن تتجبر تاني

اتحركت معاها علي النيابة و وكانو ورانا ستو وآمنة و زينب وصلنا النيابة وادلينا  ب أقوالنا وبعداك وصلت ام الشهيد مدثر وحرفيا كانت بتدردق في الارض وماقادرة تستوعب الحصل لي ولدها الكان معاها قبل ساعة في البيت وجات لقتو جنازة سايح في دمو
حياتنا كلها بقت دم في دم  حسبي الله ونعم الوكيل فيهم كلهم

تنويه : الشهيد عثمان ما كان في القيادة و  علي حسب كلام عمته كان ماشي التمرين ف ما هو الكان بلقي في القصيدة هو ما بعرف بتكلم عربي كويس

تنويه تاني ما كان في  اي قوات نظامية غير عساكر الجيش في المنطقة دي وفي اللحظات ديك

تنويه اخير : الضرب كان تقيل يعني زخيرة تقيلة يعني في أوامر للضرب مافي اي تفلت او متفلتين

كنا يادوب ابتدينا نتعافي نفسيا من القيادة وفض الاعتصام
لكن من الواضح انهم عاوزين يقتلو اكبر كمية مننا
والباقيين يعيشو مشوهين نفسياً

#عثمان_كتلو_البرهان 
#مدثر_كتلو_العسكر
شاهد عيان