الجمعة , مارس 29 2024
ardeenfr
أخبار عاجلة
الرئيسية / أخبار لالا اليومية / حجيتكم..ما.. بجيتكم 🔴 الدّابِي والعقرب

حجيتكم..ما.. بجيتكم 🔴 الدّابِي والعقرب

الدابي قال للعقرب أنا سِمي أقوي من سِمكي وكِنْ عضيت زول عِضّية  واحدة بزغلا نجيض ، عِلا إتي البريصة كن لدغتي برقد شوية وبقوم بتحتحت وما بتجي التكتح!

العقرب قالت ليا إت العفين قلبي مقاشر كضبك دا ، سِمك ما بكتل علا شكلك الشين دا ياهو البتكل ! وقالت ليا توا تعال نتشارط ونشوف ياتو فوقنا السما بكتل؟!
لكن بشرط إتا لمن تعضي الزول ألبد في القش وبظهر ليا أنا ، وكمان لما إجي دوري، أنا بلدغا وبلبد وإتا أظهر!.
الدابي قال ليها خلاص إتفقنا.
يلا جماعتك قنصو في الدرب منتظرين ليهم فريسة.

بعد شوية كي سمعو حس ناس جايين من بعيد في دربهم الكاجين فوقا عدييل، وزولايتك قالت للدابي  يلا الدور حقك أمشي عضي فيهم واحد وألبد في القش ، وأنا بظهر ليهم.

الدنيا ليل والخريف شايل، والنجيمات  متل المصرجة بغمصن وببغن، أها بعد شوية وصلوا نفرين أبو وولدا ، اللبو راكب فوق
الحمار ، والول ملقدم لأبوه من قدام.

الدابي خلاهم لمن قربو ليا وحبكو قرييب، وكف عض الول ولبد في القش ، العقرب ظهرت هناااك رافعة ضنيبا فوق.
الول قال لأبو أقيف يا أبا، أكلني لي شغيل ، اللبو تترب إدلا من الحمار ، وقال لي ان شاء الله ما أكلك ليك حبل درب؟ الول قال ليا كو والله ما بعرفا. اللبو كشف البطارية جاي وجاي ، وهنااك شاف ليا عقرب فوق بعراية بارا،  رافعة ضنيبا فوووق ، لما الول مشي عليها عشان يكتلها جرت جري دخلت القش.
اللبو قال للول،  أتاري الداهية دي أم ضنيبن سكر ، خليها الهوانة،  عضيتا ما بتسوي شغل دُت ، أرح نحصلو الفريق جدك العجال بحويها ليك.

أها  الول ألقدم لأبوه واللبو ركب الحمار وأنطأ صوط وقال ليا عر ، ومشوا في دربم .
بعد أندرقو غاااادي جماعتك ظهروا ، العقرب قالت للدابي أنا ما كلمتك يا العفين وقلت ليك سِمك ما بسوي شغل؟
الدابي سكت ساكت ما ألكلم معاها ، ومزغدم قدوما زعلان!.

بعد شوية بتن جوا جماعة سايقين ليهم مراح ناعيز ، تك تك تك.
الدابي قال للعقرب يلا دوركي جا.

أها العقرب مشت إندست في بعراية في شارب الدرب وأستعدت ليهم.
الجماعة لما وصلو جمبها وحبكوها قريييب ، الزول المطرف منهم داك وقالت ليا جاك ، لدغتا لدغي لمن الزول نط فوق ووقع  ، لمن نعالا إنسلت وطارت وقعت بعييد !
العقرب جرت القش تِرِب تِرِب ولبدت !.
الدابي ظهر ليهم هناك بتضرع أوووف أوووف أوووف ، ومارق لسانا نلط نلط نلط.
الزول اللدغتا العقرب قال ليهم يا جماعة عضتني لي نصيبة في القش دا لحقت حدي ، ورقد في التراب بقنت وبئن وبناهج والوغر لمن خلي خلقانا لينات!.
الجماعة ضوو بالبطاطير ، عِلا بشوفوا ليك دابي أزرق غليد عليا لعاليع حمر!.
جودوا بالعصاي، ومنهم كي مرق،  فرك القش فريك فاتهم جري.

الزول الكبير فوقكم قال ليهم الدابي دا ترا جان عارض،  تاني ما تطاردوا في الليل دا، أها الجماعة كسو خلو!.

زولنا الملدوغ من سمع العضا دا  دابي ، رقد خيط ، وبسك سكت عجل مسكتا أم زقالة!.
الجماعة قعدوا حرسو زولهم وروسينهم أنقطعوا في العلاج البسوو ليا.
واحد قال ليهم يا جماعة أخير  نشيلا الول دا فوق كتوفنا لمن نوصلو الفريق ، وهناك العلاج بللقي.

ما مشوا خطوتين تلاتة علا خلاص سلمهم الروح. وشالو الجثمان ومشوا بيا الفريق يسترو.

بعد ما الناس خلاص مشوا وأندرقو وحسهم أنقطع ، الدابي والعقرب جوا نابتين ، العقرب فريحانة ضحكت جااااك ،  والدابي زعلان لمن بِنفّس يلا يلا ، التقول يطرشق!.

العقرب قالت ليا أنا ما قت ليك سِمك دا هوان ساكت ما بكتل زول علا شكلك الشين دا ياهو البكتل الناس من خلعتهم منك؟!
الدابي عاين ليها ساااااكت لمن عيونا رغرغن من الزعل ، ومشي خلاها أندخل في الكركور!.

*كسرة:
أعتقد جازماً أن  مرض كورونا مثله مثل الدابي ( الثعبان) في القصة أعلاه ، وهي مثلها مثل نزلة البرد العادية إلا أن التضخيم الإعلامي والتهويل يجعل الإنسان خائفاً ومهيأً للموت ومستسلماً لقدره!

محمد عبد الرحمن الناير ( بوتشر)
            ١٥ مارس ٢٠٢٠م

 

Print Friendly, PDF & Email

عن laalaa

شاهد أيضاً

حزب المؤتمر السوداني تصريح صحفي

Share this on WhatsAppحزب المؤتمر السوداني تصريح صحفي طالعنا البيان المؤسف الصادر من سكرتارية اللجنة …

اترك تعليقاً

لن يتم نشر عنوان بريدك الإلكتروني.