*من حلقة أسرار وخفايا الحركة الاسلامية الثانية في العربية طلعنا بالاتي* :-

١/ جابو اضعف كوادر لقيادة المؤسسات وشالو أفضل الكوادر الوطنية .
٢/اتكلموا عن فسادهم داخلهم وداخل بيوتهم واقروا بيه اكتر من كلامنا نحن ناس ( الكييورد ) وسقطت جواهم هم الحرامية قبل ما تسقط برة .
٣/ التنظيم كان برضع من لبن الدولة وكل لحمه ودمه حرام.
٤/ أمين حسن عمر بعرف يردح ويوصف اجعص من كل ( النائحات ) الكانو بأجروهن مؤخرا في ظاهرة غريبة في بكياتهم ( والله صحي ) ده لما علي عثمان طالب بي اعدام غازي وجماعته.
٥/ الدموي علي عثمان لا يتورع في قتل اخوانه في التنظيم واعترف بقتل ٢٨ ضابط ( يحول للجنة التحقيق في شهداء رمضان ومرفق اعتراف مسجل ) يعني جهزوا حبلو ساي للمشنقة.
٦/ طلع اللخو بتاع العربية البظهر كخبير في ثورة ديسمبر داك ( اللواء عبد الباسط ولا منو كده ما بعرفو الوشو لفتاوي ) طلع خبير كبير برضو في شوري الحركة الاسلامية ( تصدقوا ؟؟)
٧/ غندور قال ليهم غشو الشارع والقوى السياسية وخلونا نعمل العاوزنه نحن وما غش الا نفسوا وقعد يتلفت يكوس ليها عند الدقير.
٨/ شيخ أنس عمر كان مقترح صرف اضافي على الحركة الاسلامية من الحكومة وربنا ما مد في عمر نظامهم عشان يغتنو وكلو مسطر عشان كده هو الأيام دي اكتر زول صوته عالي وبأسم ( ذات الشريعة )
٩/ البشير شكلو قنع من خيرا فيها وقال ليهم الناس ديل ما طارحين أي مفاهمة وقال قالو ( تسقط بس ما معاها أي حاجة تانية مش كده ؟؟) ونقول ليه ياها زاتها تسقط بس ما معاها التكتح وكان مغالطنا أسأل العنبة الرامية في بيتكم ( وداد )
١٠/ المؤكد تماما عندنا عند شيخ عبحي وطيبة ( ٩٠٪ ) من ثروته وبشهادة ( الرفيق علي عثمان نفسه ) وبالقانوووون قال أي جنيه عندك هم ختو فيه ٩٠ ف شيل ال ٩٠ في المائة حقتنا دي وامشي علي النيابة عدل سلمها لما نشوف ال ١٠ في المائة دي حقنا فيها كم ؟؟
١١/ في واحد كده شكلو ختو فيه ٩٩٫٩٪ من مال الحكومة لانو مالي كرسيين ونص وبطنو برضو ما مرتاحة وجسمو زاتو ضاق عليه لانو ما قادر يتنفس ف ده لو عرفتوه ورونا اسمه ده ثروة قومية ضخمة جدا.
ختاما على الحكومة دي شراء الحلقات دي وتاني لا محتاجين لجنة تحقيق في فساد لا انقلاب لا اعدامات نطق بي حكم بس وتجهيز حبال للمشانق لكن اعملو حسابكم للزول ال ما عرفتو ده لأنو حبال ما بترفعو ليكم .
واقول قولي هذا وما أنا الا فاعل خير وماسك محضر التلخيص
تاني ما اسمع لي كويز يتكلم عن دين ولا نزاهة ولا نضافة شفنا نضافتكم ودينكم زااااتو من جوة .
ف اركزوا بالله ما تخربو الموت بالرفسي .

ونحن شعب اوووسطي
عمر كبير