حتي نتجنب الإنفصال!

أولا: التنظيمات النسوية والحركات المسلحة و الاحزاب السياسية و المجتمع المدني ساهموا بدرجات متفاوتة في التثوير و التغيير، ومن العدالة انه يشاركوا في جميع مراحل صنع القرار. و دا ما حصل ..لأسباب غير موضوعية..و ممكن اسميها اخطاء تنظيمية مرحلة .. (خلال إعمال مبدأ حسن النوايا)..بس دا نهائي ما بيعفي من انه الناس تستدرك  و تعالج الأخطاء. .
🛑المافاهماه كلو كلو هو انه متين الدفاع عن الحق في التمثيل اتحول بقدرة قادر لوصمة عار..و دي برضو حاجة مرحلة من الانقاذ لأنه المناصب بتستخدم موش للتكليف بل للتشريف ما للخدمة بتاعة الناس و الوقوف علي راحتهم بل لاستغلالهم  ..
لكين لمن زول يطالب بحقه في المشاركة مفترض الناس حتي لو علي مضض تديه الحق دا بدون منة..هو حق..و في معايير محددة و معادلات للمشاركة ما من حق زول يتلاعب بيها..و طبعا التلاعب بيها بيعني انه الناس محتاجة تناضل و تستمر تناضل لتثبيت الحقوق دي..و إرساء اسس ممارسة ديمقراطية سليمة (بمحاصصات سليمة و خلال تداول سليم للسلطة و توزيع عادل للثورة و كدا) لكين لمتين يا جماعة يستمر التلاعب و الفوضي و علي حساب منو و ليه؟!
🛑مسألة وجود تعالي قبلي( عرب و زرقة و جلابة و غرابة و خلافه) في السودان دي حااااصلة..اي زول شايف روحه احسن من التاني و علي فكرة عشان ما يجو اهلي الزرقة يقولو هم ما عندهم تعالي قبلي عاوزة اقول كinsider من جوة انه هم برضو شايفين روحهم(انا ما معفية )..و الرواسب دي بتظهر من الجانبين في الزواج و السياسة بالتحديد..و من البوست دا ممكن انسف ليكم رموز سياسية كبيييرة كبر شديد بيمارسوا في الحاجة دي..بدون يرمش ليهم طرف..و بيمارسوها سياسيا ما اجتماعيا بس..
🛑يلا عشان كدا لمن نناقش قصة الهوية بنناقش الهوية السياسية (الجوة و البرة منو) us-them ..منو الممثل و منو المقصي..وهل الزول الموجود في مركز الدائرة السياسية بيتصرف علي اساس هويتاته المتعددة سياسية او عرقية او خلافه.اما قصة التعدد الإثني و تعقيداته دي بتتحسم بالتصاهر و العدالة الاجتماعية و المساواة في الحقوق. و علي اساس المواطنة او قوانين الهجرة و اللجوء..عشان الناس لمن تطبق دا قصديا بتنجح تطلع من الأوهام. .و بيتحقق السلام by default
🛑لمن اتشكل وجدان موحد في الثورة دي..اتشكل حول مفهوم ( المهنية)..يعني جزئيا الموضوعية في التعاطي مع القضايا و دا بيستبعد تلقائيا اي طموح او ميول ذاتي..و الكلام دا اتمهر بدم شهداء..
🛑المهنية بتقتضي أنه نحنا نطبق ببساطة مبادئ العدالة الانتقالية و ننادي بيها كلنا و ندقق في الوثيقة الدستورية و نشوف الناقص شنو و نتمه..بدون نستبعد زول ! حتي لا نتشظي!
🛑برضو في فئات مختلفة أو اقليات كأصحاب الهمم ألهموا الثوار بعزيمتهم و هي جزء من قدرتهم ،كطبيعة ثانية، في التعاطي مع الحياة..و بالتالي لا يمكن تجاوزهم في سياق تشكيل دولة سودانية حديثة..ناهيك عن إهدار حقهم ..و بندهش ليه ما بيطالبوا بحقوقهم بصوت عالي ..!
🛑 مهنيا مهم جدا الناس تصمم مصفوفات للتمثيل العادل والحقوق ..نتجاوز بيها الصراعات الجانبية الممكن تتسبب في إجهاض ثوراتنا.

نجدة منصور 
14/أغسطس/2019