💥 رواية شاهد عيان عن فض الاعتصام 

‏من حقكم ومن حق الشهداء ان نورى ماحدث 
اي في ناس كتار حكت واي زول تقريبا عرف الحصل شنو بس لازم كل زول يحكي من الشافوا هو والحصل قدامو ك ‎#توثيق_مجزرة_القيادة_العامة :
من الساعة تسعه مساء الثاني من يونيو انتشرت الاشاعة بصورة قوية انو الليلة حيكون في محاولة لفض الاعتصام

‏الساعة حداشر ونص تقريبا انا خشيت القيادة 
العدد كان حبة والكهرباء مفصولة عشان المطرة 
خشينا من برى لحدي ش النيل الوضع في القيادة كان عادى بس ش النيل كان حاجة مختلفة
كان في حصار من الدعم السريع لمتاريس ش النيل والثوار القاعدين هناك
من كبرى كوبر كانت في تاتشرات دعم سريع

‏وجنب ترس هندسه الخرطوم كانوا بعملوا في اشارات ضوئية بينهم وحركات تخويف
الساعة اتنين اللي هي كانت الاشاعة بتقول انو الفض حيحصل فيها ماحصلت حاجة كنا قاعدين في الكلينك بعداك طلعنا قدام ترس الصمود نشرب قهوة وقعدنا هناك لحدي اربعة وحاجة الاعداد زادت والجو بقي لطيف

‏الساعة اربعة ونص تقريبا بدأت اول التحركات خشت كمية كبيرة من تاتشرات الجنجويد بي ترس البلدية وخشت ش القيادة وارتكزت قدام البوابات
اتحركنا ع الجوية والبرية كان ناس السابعة مشاة خلاس قفلوا ابوابهم وسحبوا تاتشراتهم
الهجوم بدأ في ش النيل قوات ترتدي كل الازياء جنجويد شرطة واحتياطي اسود

‏اتضح لاحقا انو اللابسين اسود هم ضباط دعم وضباط جهاز وقيادات شرطة للسيطرة
الهجوم في ش النيل كان عنيف فتحوا المتاريس وسكوا الناس لحدي جوه الجامعة ولحدي العمادة وش الكلينك
قدام التدريب المهني وجنب ترس الصمود الثوار قدرو يرجعوهم ويصدو جزء من الهجوم

‏في اللحظة دي ارتكز الجنجويد ورا ترس وبدو يضربو رصاص حي في الصدر والرأس مباشرة في كمية من الثوار استشهدوا في الحتة دي 
الثوار انسحبوا وودو المصابين مستشفي المعلم وبقي الرصاص مدور والكر والفر شغال من ش النيل لحدي مستشفي المعلم

‏قدام القيادة الوضع كان مختلف حبه 
الناس وقفت تهتف للتاتشرات بعدها جات بكاسي بيضاء ملانة ناس لابسه زى الشرطة الازرق وطوقت الاعتصام من ش القيادة لحدي صينية بري وش عبيد ختم
مع استمرار الرصاص والناس من ورا وصلت قدام السابعه مشاة وابوا يفتحوا الباب ووصلوا قدام المسرح والجوية

‏وبقت اغلب الناس راكزة في ش القيادة زاتوا وبتحاول تترس وتثبت
في لحظة واحدة بدا هجوم بالرصاص الحي من الجنجويد علي الثوار من ورا من جنب السابعة والجوية وبدفعوا في الناس علي صينية بري في نفس اللحظة نزلوا اللابسين ازرق ومعاهم الجنجويد وشايلين عصايات وسيطان عنج وخراطيش وعصي كهربا

‏كان الهجوم واضح انو فض للاعتصام وانو الناس تطلع بصينية بري
فعلا مع الرصاص الكثيف المباشر الناس بقت تطلع وهي راكزة وبتضارب في الجنجويد 
في اللحظة دي تحديدا انا كنت قاعد قدام غرفة الكهرباء الجنب السابعة مشاة
في هجوم كثيف بالرصاص اضطرينا ندخل الحوش بتاع الغرفة دي من كترة الشهداء

‏القدامنا الوقعوا بالرصاص بعداك الجنجويد قرروا يضربوا الرصاص جوة الحوش دا ومن الطابق الاول من العمارة 
اتدخلوا ناس السابعة مشاة وقالوا لينا تلبوا هنا
تلبنا السلك الشائك للسابعة مشاة قعدونا في الارض وبدوا يضربوا فينا بالجزم والدبشكات والسيطان
في النهاية فتحوا باب صغير وطلعونا

‏للجنجويد في حوش العمارة بعداك وصلنا دق وجري لحدي مستشفي المعلم 
انا كولا شخصيا شفت ستة استشهدوا قدامي برصاص مباشر وسبعة جثث شهداء قدام بوابة المعلم
بعداك مادخلنا طلعنا خشينا بري
‏الساعات دي ماحتنمحي من ذاكرتنا للابد 
رجعتوا النت مامعناها حترجعوا دم الشهداء
ماحترجعوا حقوقنا ماحترجعوا احاسسينا
حنقلعها برانا 
والدم قصادو الدم لو حتي مدنية
3/6/2019
٢٩ رمضان
‎#توثيق_مجزرة_القيادة_العامة