Laa-Laa لا لا موقع شباب السودان الحر
نحن قبيل شن قلنا :
بقلم / إسماعيل عبدالهادي امام
ماتم من اتفاق ثنائي بين لجنة امن البشير المسماة بالمجلس العسكري الانتقالي ومجموعة من ابناء الزوات والتجار المرتاحين وبعض العطالة من سماسرة السياسة الذين تظهر ابداعاتهم دائما في الاستهبال وفنون التمثيل والمسكنة والتغلغل ببطء في استلاب احاسيس الشعب السوداني الطيب مثل تغلغل دبيب الخمر في شرايين السكاري هؤلاء يجيدون هذة الصنعة بامتياز لانة عمل موروث اب عن جد، حيث طبقوا وصية الاجداد التي تقول ، ( تمسكنوا حتي تمكنوا وتمكنوا تسيطروا)
عندما كتبت قبل عدة ايام عن راي الواضح في الشخصيات التي فوضت نفسها نيابة عن الشعب السوداني لتتحدث باسمة وتقرر في مصيرة كان راي في الشخصيات نفسها كلهم او جلهم من الشمال النيلي وبيوتات حزبية معروفة وتجار وابناء قيادات عسكرية سابقين تربطهم صلات الحسب والنسب والمصالح المشتركة مهما اختلفوا في التوجه والمنهج والمعتقد لديهم خطوط حمراء لايمكن تجاوزها وهي عدم اعطاء اي فرصة لسيادة وحكم هذة البلاد لاي كائن من كان خارج هذة الدائرة.
كل هامش السودان حمل السلاح ضد هذا الاقصاء والاستعلاء علي مر الدهور والازمان فاضت ارواح الكتير من ابناء الوطن الشرفان الذين دافعوا وناضلوا وقاتلوا من اجل الحرية والمساواة حتي اضعفوا نظام المؤتمر الوطني وجعلوة يترنح ويتارجح ذات اليمن وذات اليسار وعندما اثمرت شجرة النضال وجاء وقت قطافها ظهر هؤلاء الثعالب يرتدون ثوب الوطنية ويتدثرون بالوقار والكلم الطيب وحسن النوايا ،
نضال مدة ستة اشهر فقط نالوا كل ما طلبوة ثم استداروا ليوزعوا العطايا والهبات لاصحاب الحق والنضال الحقيقي الذين افنوا زهرة شبابهم عشرات السنين بين الاحراش والادغال وحق القول فيهم ( قام من نوموا ولقي كوموا)
نحن دعاة سلام ونسعي الية بكل ما اوتينا من وسائل وسبل لكن بشرط ان يكون سلام حقيقي يجد كل اهل السودان انفسهم في داخلة.
قلنا من قبل ان وفد التفاوض يجب ان يتم فية تمثيل كل اقاليم السودان حتي يري مواطن دارفور نفسة فية ومواطن كردفان وجبال النوبة والنيل الازرق وشرق السودان وشمالة حتي هامش الخرطوم وليس فقط مواطني بيت المال والخرطوم اتنين والمقرن والمزاد بحري والطائف والرياض الشعب السوداني هتف بكلمة عدالة وكررها مرارا وتكرار الشعب هتف ياعنصري يا مغرور كل البلد دارفور ، اين دارفور الان في وفد الحرية والتغيير كيف يتفاوض شخص باسم السودان كلة ولا يعرف شي عن تابت وام برو وكرنوي والطينة وبندسي وام دافوق وابو مطارق والردوم في دارفور ولا يعرف طروجي والرقفي وام دحيليب وككرة وعبري وتلشي ووالي ام كرم في جبال النوبة كيف تتفاوض باسم السودان ولاتعرف اين يابوس والكرمك وقيسان وباسندا وبني شنقول واقليم الفشقة المتداخل مع حدود السودان والحبشة كيف تتفاوض ولاتدري اين الشوك والحواتة والحوري والنحل في ولاية القضارف ودرديب وجبيت واركويت واحمد قول شمالا في البحر الاحمر هؤلاء يتحدثون عن الخرطوم وعن التجارة والاستثمار والاراضي والعقار وعلاقات الدول العربية وحسن الجوار تم الاتفاق بين المخطوبيين لكني اخشي فسخ الخطوبة في وقت قياسي لايتصورة الجميع لهذة الاسباب.
الحرية والتغيير وعدت الشعب السوداني الطيب انة لاعودة للحوار الا بعد الوفاء بهذة الشروط وانتم تعلمون ذلك
1/ لجنة دولية للتحقيق في فض الاعتصام وقتل المعتصميين.
2/اعادة خدمة النت وهي حق مشروع لاي مواطن سوداني.
3/ خروج قوات الجنجويد من العاصمة.
ولم يتم تنفيذ اي شرط من هذة الشروط وحتي لحظة كتابة هذا المقال . وتم الحوار المباشر وتم الاتفاق قبل ان تجف دماء الشهداء امام القيادة العامة وقبل ان يتم اكمال انتشال الجثث التي تم اغراقها في النيل لان الجمرة بتحرق الواطيها اعضاء وفد التفاوض لم نسمع لاسرة من اسرهم بكاء او نحيب ولم نجد منهم قتيل ولا جريح عموم الشعب السوداني الشرفاء زاقوا مازاقوا من الضرب والشتم والسحل ومداهمة المنازل ولم نشهد ذلك لاحد منهم وان تم ذلك يكون من اجل التلميع وزر الرماد في العيون اذن هذا الاتفاق هو اتفاق مصالح وتقسيم للكيكة ولمن نصل مرحلة التقسيم تشيفوا النطيط والفنجيط ونقض العهود وحليمة تاني بترجع لقديمها ولا يصح الا الصحيح حكم السودان لابد ان يكون بالتساوي وكل اقليم لازم يجي منوا رئيس ونسبة التمثيل في الحكم تكون بالتعداد السكاني ماممكن من الاستقلال 10% فقط من الشعب السوداني يحكموا بقية ال 90% ما تجوا تقولوا لينا تكنقراط ولا يحزنون كل اقاليم السودان فيها تكنقراط وفيها متعلمين ومثقفين وفاهمين وكمان وفي واحدين كتار برضوا زي حميتي عندهم ركوب راس ولو بتلفوا وتدورو عندنا ناس عورا وعبطا بظهروا ليكم واصلا ما خايفين من الموت ولا حاجة اصلهم من ربنا خلقهم ميتين .
خلاصة الامر يجب مراجعة هذا الامر بتاني وروية واشراك كل اهل الهامش اصحاب الشان الحقيقي ومعالجة المخاطر المحدقة التي تحيط بالسودان .
