قصيده البرجوكي

رحم الله الشاعر يوسف البدوي حمد شاعر قصيده البرجوكي التي كتب نصها في العام ٢٠٠٣م وكان يحلم بالثوره والحريه وهو من ابناء كجمر توفي في حادث حركه ما بين الابيض وبارا في عام ٢٠٠٧م  تخرج من جامعه امدرمان الاسلاميه كليه الاعلام في العام ٢٠٠٠م وعمل باذاعه جنوب وشمال كردفان … اللهم ارحمه واغفر له

اجمل قصيده والله

شايفنك يا البرجوكي
متوشحه بالقمرات
مشلوله بنص دستوري
كاتباه الدبابات
الناس الجد راجينك
الناس الجنهم ثوره
السدرو بنور الهامش
الصبرو سنين ودنين
الناس المحرومين
الشالو الشمعه سنين
السكنو بيوت الطين
الهتفو بنبض الشارع
حريه-سلام-وعداله
والوحده خيار الشعب
والشعب الطيب صابر
مضبوح الروح والقلب
ودران بيفتش ذاتو
في أجندة حكم شمولي
مابيدي الفقرا مصانع
لامدرسه لا من قوت
مابيعرف الا الدوشكا
الدوشكا وربط البوت
والشعب الطيب يمه
مسكون بي شوق الناس
يافقرا دواس لي دواس
ما أخير نتواثق أيوه
ونخلي الموت في السرحه
ويطير الدم في نحاس
ونحاس الجيل الجاي
في التنميه والقرطاس
ونحاس الجيل القادم
في يقظة شعب الهامش
البيسأل ربو كتييير
هل
ممكن
يحكموا فقرا؟
عفوا ياخليفة المهدي
الجبت رحيق الشمس
شكرا محمود ود أحمد
الليله نحاسك بره
في الدوله وحكم الشعب
سوداني هويتك هامش
والهامش نبض النبض
الناس البزرعو نحن
الناس البيصنعوا … نحن
الناس الركبو الخيل
بي سيف العشر الجان
في كرري
وفي شيكان
الصدق الذاتي….أنحنا
الطرح القادم …نحنا
السلطه الجايه…. أنحنا
لامدرسه لا تيار
لا نشره ولا أسمار
لا موية تبل الريق
لا عود يشق بالفاس
إلا الزول ينشققا الطططق
ياشعبي عداله عداله
يابلدي عداله عداله
عداله لكل الناس
ميزانا عديل حساس
في كف هموم الشعب
في كف دموع الناس
في أحلي أخوه وإلفه
نتعايش بي إحساس
حريه سلام وعداله
والوحده خيار الشعب