Laa-Laa لا لا موقع شباب السودان الحر
لمن بدا الحراك في ١٣ ديسمبر ، تم طرح اعلان اسمو ( اعلان الحرية والتغيير ) لكلللل الاحزاب السياسية في الساحة والنقابات.
الهدف من الاعلان كما هوواضح بداهة ، انو عايزين نشيل الرئيس ( المخلوع)ونظامو من الحكم ، يا إما بتوسيع المظاهرات ، او بكل بساطة يمشو وفد للقصر ويقولو ليهو بصورة دبلوماسية كتر خيرك ، لحدي هنا كفاية، رجاء اتنحى .
كل ال١٠٦ حزب وصلا الإعلان
فقط ٢٩ حزب سياسي وقعو + تجمع المهنيين ( اللي هو بمثل النقابات ، والناس الما عندها ولاء حزبي لكن مهنيين ، وديل ٤٠ كتلة نقابية ، يعني ٤٠ مهنةمختلفة من صيدلي لطبيب لمهندس لمحامي لقاضي لغيرو)
يالله يا سوداني يا ثائر
ال٢٩ حزب ديل كانو مقسمين تحت ٣ تحالفات ( نداء السودان ، قوى الإجماع الوطني ، التجمع الاتحادي المعارض) وعندنا بهناك تجمع المهنيين .
بقو كلهم كده كم ، ٤ أفرع تحت قبة كبيرة اسمها ( قوى الحرية والتغيير ) .
طيب ليه هم بس قوى الحرية والتغيير ؟
لانو هم بس الوافقو على الاعلان بتاع اسقاط البشير وحكومتو.
طيب وين باقي الاحزاب؟
باقي الاحزاب رفضت التوقيع على الوثيقة ، يعني ببساطةكده ما عايزين نشارك معاكم في الثورة دي .
مش كده وبس ،ياريت لو كانت اخدت موقف محايد واتفرجت ساي ، مشو بهناك عملو تحالف كده اسمو تحالف ٢٠٢٠ ، يعني بالواضح كده وما فاضح احنا مع انتخابات ٢٠٢٠ والعايز يشيل الرئيس ( المخلوع) يشيلو بالانتخابات ما الشارع ، والثورة دي كلام فاضي وما حتمشي لقدام واحنا مع السيد الرئيس ، ( المخلوع سابقا ) .
طيب يا مؤمن ،الان الثورة ومشت ، والنظام وسقط جزئيا ، وقوى الحرية والتغيير انجزت شغلا و برأت ذمتها قدام باقي الاحزاب الرفضت توقع معاها قبيل .
هسه الاحزاب دي عايزة ترجع تاااني و تتحالف مع قوى الحرية والتغيير و يشاركو في الفترة الانتقالية والمجلس السيادي بحجة ( احنا جزء من الساحة السياسية) ولازم تشركونا معاكم في القرار .
هنااا اسمحو لي اقتبس صوت محمد مصطفى عبدالقادر واقوليهم ( كنتوو وييييين من زمان لمن الناس بتموت في الشوارع وانتو بتتفاكرو مع المخلوع في كيفية حل الازمة لحدي ما نطيتو من المركب في اخر لحظة )
وين كانو ناس مبارك الفاضل ، وناس حسن اسماعيل وناس علي الحاج و غازي صلاح الدين و الصادق الهادي وغيرهم وغيرهم ، وين كنتو وقت الناس بتنطحن تحت لساتك التاتشر .
فهمتو الان انو النظام القديم عايز يرجع عبر الاحزاب الكانت متحالفة معاهو و مؤيداهو في انتخابات ٢٠٢٠ ، فهمتو انو الموضوع ما إقصاء ، وانو اعلان الحرية والتغيير كان على مسافة واحدةمن كل الاحزاب وهم الاختارو ما يوقعو واسي عايزنها بالباردة .
ياخ مع كل احترامي للثوار ، ولكم الحق بإبداء الرأي ، لكن في ناس ما عارفين حتى انو قوى الحرية والتغيير ٤ كيانات الذكرتهم قبيل ، وانو تجمع المهنيين يشكل فقط ربع الحراك ، يعني حتى شعار ( تجمع المهنيين يمثلني ) في المرحلة دي شعار خاطئ ، لانو تجمع المهنيين لا يعمل بمعزل عن باقي قوى الحرية والتغيير .
( قوى الحرية والتغيير تمثلني)
بعد ده اظن عقلك دليلك وما بتحتاج شرح ابسط من كده.
#تعديل
وبعد ده بقول نفس الكلام القالو صديق يوسف ، الاحزاب الحاسه انو تم اقصائها خليها تمشي شارع القيادة وتطلع المسرح وتعرض نفسها على الثوار ، ونشوف هل حيتم قبولهم ولا لا.
