#خيمة_اولاد_امبدة

************
● بالرغم من ساحة الاعتصام تكتظ بالمشاهد الجميلة والمتفردة الا ان خمية اولاد امبدة قدمت نموزج فريد في الاصرار علي مواصلة الاعتصام حتي تحقيق كافة المطالب ….
● اليوم كنت في ضيافتهم منذ الصباح الباكر ورأيت منهم اصرار يسعد القلب ويؤكد ان هذا الاعتصام باقي ……
● هم ذاتهم شباب امبدة الذين رافقتهم في جل المواكب والمظاهرات الليلية ورأيت من صمودهم ما ارعب قوات النظام
● كانوا اول الواصلين الي ساحة الاعتصام واكدو انهم سيكونون اخر من يغادر ……
● انتبذو مكانا قصيا كعادتهم لحراسة اكتر جهة شكلت ازعاج للمعتصمين وهي (مباني تحت التشييد تسمي مدينة البشير … عاني منها المعتصمين الامرين بسبب وجود القناصة شبه الدائم فيها) اصر اولاد امبدة علي حراستها بأنفسهم برفقة الجيش ليوفروا الامان الكامل للثوار ….
● تأقلموا سريعا علي الوضع وصنعوا خيمة من المشمع بها كل وسائل الحياة الترفيه الممكنة (برميل موية وعدة شاي وهيتر ووصلات لشحن التلفونات وكشاف كهرباء كبير للاضاء ليلا) وبظبطوا حلة ثاااااابتة كل يوم …
● جابوا معاهم فرشات وملايات وكوتشينة وقسموا انفسهم لي ورديات (ناس تحرس وناس تاخد راحة) …..
● عادي تلقي ضابط برتبة طالع من خيمة اولاد امبدة لانو كان بنسق معاهم في حماية العمارة او بلعب معاهم كشتينة ….
● لما تسأل اي واحد فيهم قاعدين هنا لحدي متين تجيك الاجابة بكل صدق (نحن م طلعنا عشان نقلع البشير بس … نحن عندنا مطالب لازم تتحق بالكامل) ……
● لمن يشوفو الناس هادية في ساحة الاعتصام بطلعوا يشقوا الساحة من اقصاها الي اقصاها وهم بهتفوا (نصف ثورة يعني موت) ….
● لمن تكون في إشاعات او يحصل هلع بين المعتصمين بطلعوا يطمنو الناس انو الوضع آمن ومستتب ومافي اي حاجة ولو سمعوا اطلاق رصاص اول بجرو عليهو …….
● آمنت وايقنت ان ثورة يحرسها اولاد #امبدة_سيتي لن تهزم وانهم رغم كل ذلك قادرين علي حمل شغفهم وحياتهم الخاصة معهم الي اي مكان ….
مهادن

#الاعتصام_مستمر