*وِريــقـة التـوت*
——————————–
***
السر عثمان الطيب
٢/فبراير/٢٠١٩م
***
*سقطت وريقة التوت*
*عن عورة الكهنـــــوت*
*عن عورة الطـاغــوت*
*عن عورة الجــبــروت*
**
*مالي الحناجر صوت*
*#تسقط حكومة الموت*
*الآر بي جي والبوت*
*البلطة…..والنّــبّـوت*
***
*#تسقط حكومة الذل*
*رمز الفقر….. والسُّل*
*وعد الكضب..دُل دُل*
*#تسقط كتايب الضُّـل*
***
*#تسقط حكومة الجوع*
*العوع.. ولحس الكوع*
*الشعب ماهو خنوع*
*قال تاني مافي خضوع*
*قط ماب يظل مخدوع*
*بي كضبة المشروع*
***
*#تسقط خلاص وخلاص*
*تَحـَتــِـل.. تروح .. تتماص*
*الشعب هبَّ… خلاص*
*بي جرأة.. بي اخلاص*
*باكر خلاصو خلاص*
***
*حاكومة التخريب*
*السرقة… والتجنيب*
*السحل… والتعذيب*
*العنف… والترهيب*
*اللوثة… والهضريب*
*الجهل… و (الربريب)*
*#تسقط..شموسا تغيب*
*#تسقط…اكيد..و قريب*
***
*في داهية يا إنقاذ*
*يكفينا استفزاز*
*ما كنا يوم شُذّاذ*
*أصواتنا ماها نشاز*
*من قمنا نحن عزاز*
*للحق دوام ننحاز*
*طيبين… حنان ولذاذ*
*ثوار… شُـداد… افذاذ*
*مافينا زول لاواز*
*#تسقط.. ومافي ملاذ*
***
*كادَنْ… تلاتين عام*
*وان شاالله لا تـَمّــنْ*
*وان شـاالله لا زادَن*
*لا قـدّمـَن … قِــدّام*
*الشعب… ما (كادن)*
*غير الرمـاد أكـــوام*
*تضليل ورا تضليــل*
*أوهـام ورا أوهـــام*
*واللهِ من زي ديـــل*
*قسماً.. بـَرِي الإسلام*