بكائية على أطفالنا الغرقى

*الفاجعة*
السر عثمان الطيب
أغسطس 2018
****
*يا فاجعة…. يا بلدي*
*يا وجعة .. يا كبدي*
*يا دمعة…… يا بنتي*
*يا لوعة….. يا ولدي*
****
*أولادنا……….أكبادنا*
*مدخورنا.. ديل زادنا*
*أورادنا………إنشادنا*
*تاريخنا…….. ميلادنا*
*عِــزّتنــا……. أمجادنا*
*يا قرة العينين*
*زينتنا ….. يا سمحين*
*وين زي سماحكم وين؟*
*فالحيـــن وطيّـــوبـيـن*
*يا القمتــو منّ النـــوم*
*فجراوي من ذات يوم*
*يوم انكتب….. معلوم*
*المركب المشئوم*
*قال :  يلاّ يا رامي*
*وكان العِـرِق حامي*
*خيران ورا خيران*
*بالحَجْرة… بالحَجْرة*
*لا دكْمة…… لا عترة*
*الا القدر محتـــــوم*
*اليوم دا كان معلوم*
*فيهو القدر مقسوم*
*فيهو العمر مختوم*
*مو منتظر بكرة*
*يا فاجعة يا حسرة*
****
*شفّعنا…. يا الزينين*
*وين انتو؟وينكم؟وين*
*وينـِـن شنيطاتكم؟*
*وينـِن كراريسكم؟*
*وينِن قراطيسكم؟*
*وينـِن قليماتكـــم؟*
*وينن هديماتكــم؟*
*وينن جزيماتكم؟؟*
*وينن بسيماتكم؟*
****
*يا نيلنا… عَهْدَنا بيك*
*ما كنت قاسي عنيد*
*دايماً.. مدى  الازمان*
*دالق حنين وحنــــان*
*نطلب … تقول لبّيكْ*
*وتجود..تزيد.. وتزيد*
*مالك صِبِح خَـــوّان؟؟*
*بدّدتَ احلامنا*
*سوّدْتَ ايامنـا*
*نكّستَ اعلامنا*
*جفّفْتَ اقلامنا*
*والناس قبايل عيد*
****
*يا فاجعة… يا بلدي*
*بلدي البيبكي حزين*
*ليه المدارس ديل*
*يمشولا عبر النيل؟*
*ما تبقى وسط الناس*
*يصلوها بالكرعين*
*يمشولا دوغري عدييل*.
*ولاّ البلد دا خلاص*
*إنسانو أضحى رخيص*
*إنسانو أمسى ذليل*
*جيلين … وأصغر جيل؟*
*ونهارو مظلم… ليل*
*ما لاقي ليهو دليل*
*لا لاقي ليهو خلاص*
*غرقان… حتل..غرقان*
*يحليلو.. آهـ… يحليل*
*منكوب … شبع أحزان*
*الويل على الظالمين*
*الويل على الفاسدين*
*الويل…. وثم الويل*
****
*يا ربي… يا الخَـلـَـــقْ*
*من طين… ومن علق*
*يا كاتب النجا*
*يا قاسم الغرق*
*ذو القدرة يا ذو الباس*
*ثبّــت قلوب الناس*
*لا  يدخلا الوسواس*
*يا مالك الاملاك*
*ومسيّــر الافلاك*
*شُفّٓعنا جوك.. شُهداك*
*ياربي يا حنّــان*
*مولايا.. يا منّان*
*يا سيدي يا رحمن*
*أقبل مجيهم ليك*
*في أعلى أعلى جنان*