♨يلاكم♨ {نداء بصوتٍ عالٍ) {أربعاء المسيرة الهادرة ٣١يناير} ••

لنا مهدي
••
ست الشاي
عيال الشارع الصابرين
والبنبش زبالة الحلة
يمكن يلاقي لقمة اتنين
والمحمول
كتير ضيفان
والبنلاقي جوة وشيها
جنب الكد
والعرق البينضح جد
بشاشة تخجّل الإنسان
عشان أهلي الحنينين ديل
ووطني الليهو كم كمين
يعاني الويل
عشان مرضان
ومكتول حيل
وللمظلوم
وللمكلوم
وللمهموم
ومكسور الجناح بالحيل
ولي أطفال
جعانين جوع
عيونهم بالفقُر واقعة
من تصبح لحدي الليل
دموعهم تهزم القدرة
صراخهم يكبت الفكرة
وللمسجون بدون تحقيق
وللأيتام
وضد الخنق والتضييق
بنعرض في طريق الحق
بلدنا أحق
بميدان عام
تعالو نكسّر الأصنام
نرجّع هيبة السودان
نقولها بأعلى صوت صارم:
يا ظالم
نحنا أبينا
نحنا عصينا
ما بيرهبنا
لا خنجر
ولا عسكر
ولا بنبان
♨♨♨♨