*لي وين ماشي*

شعر: معز عمر بخيت
_____________________
لي وين ماشي
يا بلد اتوجع بالحرمان
لي وين طاشي
خطواتك راجعة
وعجزك بان
وزعيمك يرقص
هاشي وباشي
لا سكت الصوت
في شوارع الموت
لا جف النيل
رغم التنكيل
عصر العصيان
جاييك غاشي
الناس في البيت
ماكلين الجوع
شاربين العطش
الحافي دموع
ساقين الصبر
احساس موجوع
والروح ما نزفت
نقطة دم
الصدر اتنفس
غيم الهم
غابت من عينك
لحظة خوف
انحسب الشوف
في نظرك كم
نحن الباقين
وسط التمكين
الجد والخال
الأب والعم
يا زول اتلم
بيت مدحك ذم
يا وطن استشهد
وسط أكفان
مدوها سحاب
وتراب ودخان
والزرع الأخضر
و الرويان
ماتت أوراق
أغصانو زمان
يوم سرقوا المال
باعوا السودان
واحترق الخير
الظل دهور
ممدود إيمان
وسماحة الدين
الكلو يقين
أصبح يتباع
جوه الدكان
والناس التايهة
وسارحة وغافلة
ممنوع تحتج
للكرش الماهلة
في الزمن الفج
ح نصلى النافلة
و نروح الحج
وتسير القافلة
بين الكثبان
تمحو الأحزان
ويمين بالله
ما فيش انسان
في هذا الكون
واعي وصحيان
عارف من وين
أو فجأة وكيف
جونا الكيزان!
الواضح انو
عذاب القبر
وغضب الله
سلط في الناس
شيطان الجاه
بعمايل النفس
حكمونا فساد
سرقونا نهار
نصبوا الأصفاد
كتلونا جهار
نشروا الأحقاد
والفرح انهار
رحماك يا رب
تحمي الأجيال
من شر القوم
والظلم انزال
ويعود الحق
ويطل الفال
ويعم الخير
نجوى وسلسال
لا بينا صراع
هدام وقتال
بس بينا يراع
تخطيط فعال
والحق مرفوع
والتقوى خصال
أيدينا شموع
للبلد أوصال
يبقى المجموع
زحمة آمال
صوتك مسوع
راسك في العال.
______________________
*معز عمر بخيت*