شقى ومجنون

بسم الله الرحمن الرحيم
يوسف البروف
شقى ومجنون
………………………………………
اول مرة امشى لى لدكتور نفسانى … انا قايل الناس البمشوا للدكاترة النفسانيين ديل الا الناس البكونوا مربطين بحبال وبفلقوا بالحجار…. سبحان الله, صحى كل شئ ثقافة… حتى الجنون ثقافة… نحن فى البلد كان جنيت اقرب حبل حمار بدنبلوك بيهوا واقرب فكى ولوح محاية وزوارة وسوط عنج وخلاص…تانى لو بقيت نصيح الناس حتناديك بالمجنون… الجنون عندنا عار بنبذوا بيهوا… عادى جدا الواحد يقول ليك يا مجنون او يا ود المجنونة… اها يا زول مشيت ليك المركز الطبى الحديث عشان نقابل دكتور عبد الغنى… عندى ود اختى ذى بذهج مرات مرات كدا… اول ما جيت لقيت ليك الطابق التالت مليان من اولوا لاخروا…طبعا فى البداية قلت انوا ناس دكتور عبد الغني حيكونوا بسيطين, وباقى العيانيين ديل حيكونوا موزعين بين دكاترة الباطنية والمسالك البولية والمخ والاعصاب والولادة, لكن المفاجاة غير المتوقعة كانت العكس.. كل الناس الكتار ديل كانوا منتظرين دكتور عبد الغنى بتاع النفسيات… اقول ليكم من الاخر كدا عشان تتخيلوا معاى عدد الناس… نحن منتظرين من قبال صلاة المغرب ما دخلنا الا الساعة واحدة صباحا وبعداك خلينا ليك الطابق التالت دا بس يوم وقفة العيد … اها نسيت اقول ليكم نحن عشان نحجز ساكت, يوسف ود خالى اسبوع مساكك بين المدينة الرياضية محل شغلوا وبين المركز الطبى الحديث… اها الجانب المهم فى الشغلانة دى انوا الناس المجانين ديل شكلهم ما مجانين… سبحان الله رزانة مبالغة… هدوء مبالغة… اناقة مبالغة… جمال مبالغة… ملابس ماركة… ساعات سويسرية… عطور باريسية… انا فى البداية لمن لقيت الناس منتظرين, قلت يمكن خاتين المجانين فى حتة تانية وديل مرافقين… انتوا عارفين لو فيكم واحد جا محل دكتور عبد الغني ولقانى قاعد وسط المجانين ديل وقالوا ليهوا طلع لينا المجنون وسط الناس ديل, طوالى حيملا البروف حبل واحتمال جنزير بطبلة ذاتوا… سبحان الله فعلا المرض ذاتوا ثقافة… اها يا زول اثناء ما نحن قاعدين جا واحد ببتوا وشكلوا عينة البروف الما عندوا ثقافة مرضية بتخليهوا يتعامل مع بتوا صاحبة ال 17 سنة وكدا…اها البت قامت ماشة على الكولر عشان تشرب ليها موية… ابوها مسكها من يدها… فكت يدها وقامت جارية على الكولر… ابوها قام جارى وراها وانا قمت جارى ختمتها بقدام… يا زول هوى زربقناها ليك زربيقة ارنب بس… بس فى واحدة كدا بانفيكا الخالق الناطق ختت ليك اللابتوب حقها وجاتنا قالت لينا let her ودى ترجمتها, خلوها يا عالم يا مجانين… والترجمة بلغة الناس الما عندهم ثقافية نفسية ذى البروف كدا معناتوا هو بلا عينة تعاملكم دا الجننها شنوا؟…المهم يا زول خليناها ليك… اها البت السمحة جات ساقت البت البتقابض ديك وقنبتها جنبها… طلعت من شنطتها موية صحة وادت البت الارنب الكنا دايرين ندنبلها مع ابوها… فتحت ليها حاجة فى اللابتوب… بعد شوية البت فتحت ليك ونسة وضحك… يا سلاااااام فعلا المرض ثقافة… اها يا زول انا اتخيلت الزولة دى دكتورة ختوها وسط المجانين ديل عشان كان فى زول داير يقلع ملابسوا ولا يعض ليهوا زول تديهوا حقنة تهدى من اعصابوا… اها اخوكم البروف كان واقف علي حيلوا لانوا الكنبات والكراسى والجنبات كلها مليانة… فى واحدة كانت قاعدة جنب الزولة الانا كنت متخيلها دكتورة دى دورها جا وقامت دخلت للدكتور… الحتة الجنب بانفيكا اصبحت فاضية… قامت عاينت لى وقالت لى … Have a seat ودى ترجمتها قنب يا مجنون انت لمن دورك يجى… قمت اتلفت قايلها بتتكلم مع زول تانى… قامت قالت لى… انا بتكلم معاك انت دا, انت مش patient… ودي ترجمتها يا خوانا, انت مجنون وعيان مش كدا؟…قلت ليها…. انا فعلا مجنون… قنبت جنبها… قلت ليها… الاخت دكتورة مش كدا؟…قالت لى انا patient ودى ترجمتها انا مجنونة.. قامت قالت لى… انت patient مش كدا؟… فى قلبى قلت اذا انتى بحالتك دي قلتى مجنونة معناتوا نحن ديل مفروض نفلق بالحجار عديل كدا…قلت ليها اى انا patient… فى تلك اللحظة الزول البنده الناس قال… سمندر طه… طوالى لملمت اللابتوب حقها وقالت لى nice to meet yo ودى ترجمتها سعدك بلقاءك يا مجنون انت… قلت ليها ان شاء اجن وازيد فى الجن ما زدتوا جنونى انتوا يا الحلوين… طوالى مشيت للزول البسجل وقلت ليهوا سجل يوسف محمد يوسف الزين مجنون داير يقابل دكتور عبد الغنى… الراجل قال لى اقرب تسجيل بعد اسبوعين… قلت ليهوا انا مسافر النهود ولمن اجى راجع غير دكتور عبد الغنى فى راسى مافى حاجة… سبحان الله يا خوانا فعلا المرض ثقافة… نحن الواحد لمن يفلق بالحجار حتى يربطوا ويجيبوا للفكى والناس اصحاب الثقافات المرضية العالية الواحد لو شعر ليهوا بذهجة صغيرونة كدا بس دكتور عبد الغنى جاك زول… فعلا المرض ثقافة… انا غايتوا يا خوانا وعشان نكون واضح معاكم, اى زول صاحبى او بعرفوا ساكت, الناس اللاقيتهم مع دكتور عبد الغنى ديل انصح منوا بمليون مرة عشان كدا انصحكم بالذهاب لدكتور عبد الغنى بالمركز الطبى الحديث, الطابق التالت… بعدين اجمل ما فى الموضوع, حبوب والمذاج يرجع في محلوا….
عليكم الله, كدا كل زول يرجع لمحيطوا منذ الصغر وشوفوا كم زول ضاع بسبب الثقافة المرضية الجربانة… ياما حكمنا على الناس ظلما بسبب ثقافتنا المرضية المنتهية الصلاحية والفهم والاخلاق…