هااام جدا نص افادة الاخ عادل دهب وما صاحبت اعتقاله من أحداث

************
شكرا جميلا لكل من اتصل مستفسرين ومشفقين ومتضامنين من اهل مدينتي التي احب واعشق واهلي الذين بهم اعتز وافخر شكرا لكل قاده الاحزاب والتنظيمات المجتمعيه وقاده الراي بهذه الولايه الفتيه لكل ابناء كردفان بدول المهجر وبقاع السودان شكرا لهم لانهم اهل حاره واخوه واشقاء ساعة الشده ان ماحدث ليس استهداف لي كشخص وابن من ابناء هذا الوطن اعطيت زهره شبابي وانضر ايام حياتي وظلمت وفصلت تعسفيا ولكن لم يتوقف عطائي لايماني القاطع انني لازلت قادر علي العطاء وان لوطني واهلي في عنقي دين واجب السداد،
نزعت ردائي وان لا املك من الدنيا سواء قلمي وكفاف يومي وكلمة حق ورغبة في البناء تساميت عن جراحي وظلمي وتعاهدت مع نفسي ان اقولها كلمة الحق نروم بها الاصلاح والبناء ولانبحث عن مجد شخصي او بطوله زائفه ولاندري ان هنالك من يكرة كلمة الحق ويتربص بنا غيظا وحنقا وضيقا بما نكتب،
ان ماحدث في يوم الجمعه وحوالي الساعه الواحده ونصف انني وجدت صف للوقود في طرمبة المتحده بالقرب من السلاح الطبي فوقفت في الصف كعادتي وبعد قليل اتي من يخبرنا انه يجب تحويل الصف للجهه الجنوبيه بتعليمات صادره من جهاز الاستخبارات فتحولنا للجانب الاخر وبعد قليل وجدنا ان هنالك عربات تقف في المنطقه التي تم تحويلنا منها فاستفسرت فرد الاستخبارات فرد علي دا ما شغلك فرددت عليه دا م شغلي لكن حقي فرد عليه فرد اخر عمك دا داير شنو دا مش عمك القاعد يكتب في الفيس ويصور في الطرمبات جيبو جوه قلت ليهو انا ما ماشي معاك انت رتبتك شنو وانت ماشرطه انا لو عملته حاجه وديني الشرطه المهم بدوا يدفروا فيني والناس بدت تجمع انا قلت حفاظا علي الامن وسلامه الطرمبه امشي معاهم واكيد ح القي ضابط واشرح ليهو الحاصل والموضوع ح ينتهي وعندما وصلت بوابه الاستخبارات تم فتح الباب وفي شخص نزل من العرببه وضربني بنيه لغايه ما وقعت في شنو سالته وبعد شويه جو اكتر من سبعه عساكر وبدوا يضربوا فيني بالخرطوش وشلاليت وبنيه وقالوا لي ياعميل ياشيوعي انت قايل دا جيش السكران دا جيش البرهان وعندما قلت ليهم انا ضابط معاشي قالوا لي انت مباري الملكيه ديل خلي الينفعوك ياوسخان واحد قال ليهم هم مافطروا الناس بمبان دا فطروا تراب وحاولوا يملوا لي خشمي تراب وعندما قرب يغمي علي جاء ضابط من الشرطه الامنيه وقال ليهم الكلام دا ما صاح في رائد اسمو صلاح قال لي نحنا راصدنك انت قاعد تشتم القوات النظاميه وراكب بوكس ومشيت دار فور مع الحركات المسلحه وملفك عندنا المهم دخلوني المكتب وانا في حالة يرثي لها وقالوا لي نحنا ح نخليك تمشي لكن لو راجل امشي اكتب الكلام دا عشان نكسر ليك ايديك ديل وقالوا اكتب تعهد اني مااشتكي رفضت قام المقدم قال للعقيد بتاع الامنيه امشي انحنا بنجيبو ليك نجيض وانا اللحظه عرفته انو ممكن يختو لي بنقو ول مصيبه ويلبسوني جريمه فقمت اضطريت التزم اني ح اطلع من هنا علي البيت بدون اكلم اي انسان بالحصل وسلموني عربيتي وفقدت مبلغ ١٧٥٠٠ جنيه وجهاز موبايل جلكسي ٩ وطلعت طوالي علي الشرطه حصلنا الضابط بتاع الامنيه وطلب مني ماافتح بلاغ ول اشيل اورنيك حسب التزامي ليهم ،
بعد ذلك اتصلت بالاخ د/ محمد ود/ خالد علي والاخ محمد جون والاخ حنفي وبعض الاخوان الذي نتبنوا الموضوع وهذا مالزم توضيحه لكل مشفق علينا وعذرا لركاكة الاسلوب فلا زلت مشوش ولم استوعب الحاصل بعد
        عقيد حقوقي (م)
           عادل دهب علي