كلمة الدكتور جون قرنق دى مبيور رئيس الحركة الشعبية لتحرير السودان في الجلسة الإفتتاحية للمؤتمر الجامع لأبناء النوبة بمدينة كاودا بتاريخ 2 – 5 ديسمبر 2002

تحيا الحركة الشعبية والجيش الشعبي لتحرير السودان، مرة أخرى أريد أن أحي كل الشهداء بتاعنا الأستشهدوا فى كل المحلات وفى كل الزمن في تاريخ السودان وعلى رأسهم هنا في جبال  النوبة وفى كل السودان الجديد، الشهيد يوسف كوه دى علشانهم ياهو السبب أنحنا قاعدين هنا ونجتمع هنا ، دى الأرض الحرروها بالدم بتاعهم  وعلشان السبب ده أنحنا  دائما بنتذكرهم  وديل الشهداء بتاع السودان الجديد. برضو عايز مرة ثانية نعمل تهنئة ونحى شعب النوبة، المواطنين بتاعنا فى جبال النوبة القاوموا وفجروا الثورة وحققوا انتصارات كثيرة وعلى رأسهم النسوان بتاعنا بتاعت السوان الجديد الطلبة  هناك أنا شايفكم  وأنا بسلم عليكم شوفوا المدرسة بتعكم كويس  انتو أهو اولاد بتاع المستقبل ناس بتاع  المستقبل الصغار البيبنى السودان الجديد ، برضو انتوا المؤتمرين الناس الجو المؤتمر ده  ناس جو من محلآت مختلفة فى ناس جو من الخارج وجو من الخرطوم وجو من الجبال هنا أنا بسلم عليكم كلكم وأنا بسلم على رؤساء لأحزاب الخاصة بجبال النوبة وعلى رأسهم رئيس الأسقف  فيلب عباس غبوش رئيس الحزب القومي السودانى الحر وبرضو البروفيسور الآمين حموده رئيس الحزب القومي السوداني، والأستاذ محمد حماد كوه رئيس الحزب القومي السوداني القيادة الجماعية والأخ  يوسف عبد الله جبريل رئيس اتحاد عام جبال النوبة  أنا بحيهم وبسلم عليهم الحركة الشعبية لتحرير السودان ما نزلت من السماء ولا أتت من الفراغ أنا ممكن أقول  أنو ده النضال  بتعكم،  الناس اللي أنا خاطبتهم ورؤساء الأحزاب وشعب النوبة كله عبر التاريخ فى النضال بتاعهم فى المقاومة بتاعتكم يا هو الفتح للحركة الشعبية لتحرير السودان فى جبال النوبة فنحن نتيجة لنضالكم  يعنى دى الثمرة بتاعت نضال  شعب النوبة فى تكوينات بتوعهم  كله  ونحن وكل الأجيال  سنكون  شاكرين لهم فالحركة الشعبية لتحرير السودان هى جزء من النضال بتاع الشعب بتاعنا فى جبال النوبة  أنا عاوز أبدأ  أتكلم معاكم بصورة غير رسمية، أنا حأتكلم معاكم بطريقة غير رسمية أنا بخت الحقيقة فقط، علشان فى السودان فى كذب كثير، طبعا  كل مرض عنده دواء  كان عندك ملاريا أنت بتشرب شنو؟ كلوروكوين، وكلوروكوين ده أو كوينين ده مر فدوا بتاع الكذب شنو؟ الحقيقة، والحقيقة ذي  الكوينين ده مر برضو فأنا لو قلت حاجة مؤلمة برضو فدا للعلاج،  علاج بتاع المرض بتاع الكذب البقولو فى السودان من زمن الاستقلال فسأبداء برؤية الحركة، رؤية الحركة هي السودان الجديد، وعاوز أؤكد لكم انه مهما حدث إذا  أمطرت، أو شمست،  وفى كل  الصعوبات،  الحركة ملتزمة بالهدف بتاع السودان الجديد.  الحركة الشعبية لانفصال جنوب السودان؟ هذا ليس صحيحا لكن انحنا شلنا السلاح عام 1983م علشان نناضل لتحقيق السودان الجديد ووحدته، ولكن وحدة على أسس جديدة مش  السودان القديم  أل أسسوا على أسس الظلم فقلنا  تحرير السودان، وفى مستهبلين بقولوا تحرير السودان من منو؟ ديل عايزين يقولوا يعنى الناس عايزين يقولوا من العرب، أنحنا ماقلنا كده فى ناس بقولوا كده نحن ماقلنا كده ده تحرير من الظلم، ويا جماعة الظلم ده  ماعنده لون وماعنده جنس الإنجليز استعمرونا، الناس اسود ذاتوا، السودانيين السود زي النوبة ذاتو  ممكن  يستعمروا،  الدينكا  يمكن يستعمروا، الفور ممكن يستعمرا، العرب ممكن يستعمروا، فده تحرير مش من منو ده تحرير من شنو وده حاجة درسناه، أنا الواقف قدامكم  ده أنا كنت فى انيانيا واحد وفى أنياينا  واحد الحركة فى الزمن داك بتناضل من أجل استقلال جنوب السودان  وأنا اختلفت مع  الجنرال  لاجو فى الكلام ده لمن أنا  دخلت فى الانيانيا أنا قلت شعب السودان شعب واحد لكن  قسموه،  قسموه الحكام فى الخرطوم منذ الاستقلال  علشان ما أسسوا وحده السودان على حقيقة السودان، وحقيقة السودان شنو؟  حقيقة  السودان دى  التعددية  نحن شعب  متعدد ، وتعددية  شعبنا عبر التاريخ،  وحقيقة السودان هى التعددية ، تعددية بنوعين  تعددية تاريخية  وتعددية معاصرة ، تعددية بالتاريخ وعبر التاريخ  وتعددية فى الوقت الحاضر وأنا ما جبت الحاجات دى من رأسي، دى حاجات فى الأرض وواضحة، وقبل ما أمشى حنقول الحقيقة إذا فى الجنوب زول بقول كيف يا دكتور؟ خليه يقول كلام ده ما صاح  نمشى فى تعددية  فى التاريخ إذا نقراء  أي كتاب قديم  أنت تلقى السودان فيه ده ألمانيا يا هو أنا ما بلقاه  الجزائر زاتو أنا مابلقاه. لكن السودان فيه، فى الإنجيل  السودان اسمه كوش، اسمه أثيوبيا،  لكن الأسماء مختلفة  لكن الأصل هو السودان  وإذا حاول الكثير منكم إيجاد  أول مسيحي ألما يهودي كان سوداني ومنكم من قراء الإنجيل  وأنا ممكن أعطي مثال من القرآن ورفقائي  وأخواتي  وأخواني  هنا  خلو يمشوا يدونى مثال أنا  حاستعمله كمان، بس  بسبب جهلي بالقرآن والتاريخ  العربي  أنا لا أعطبي  أمثلة  هنالك  ولكنني فى طريق  إلي  ذلك أنا تلميذ.  فى أعمال الرسل هنالك إشارة إلي راهب أثيوبي ذاك ينيب أثيوبي فى الإنجيل  وطبعا  ده كان  موظف فى  مملكة  مروى  وأصبح  مسيحي  وأظن بين عام 38-48 بعد الميلاد  هذا هو البعد التاريخي  الذي ذهبنا له  وقبل الإنجيل كانى السودان موجود،  كان فى عبر التاريخ من قبل الإنجيل  وبعد  الإنجيل  وأنت تجى  للممالك الكثير الكان فى السودان لغايت مملكة الفونج ده كله تاريخ بتعنا ياجماعة، وده انتو المواطنين بتاع السودان  يا هو كان كله قبائل وقوميات  بتعكم انتوا قولوا هم مشو وين؟ ماديل انتم  ياهو زاتوا لغايت الزمن ده، ففى أرضنا السودان، فى ثقافاتنا قامت وماتت وآخر معانا فى الحاضر، أنا بنادي دى تعددية عبر التاريخ. فى الوقت الحاضر التعددية حسع ده عندنا قوميات كثيرة فى السودان فى أكثر من  ( 500)  قبيلة المهم هو كيف أنحن نعرف شعبنا وفعلا الشخصية السودانية فى مرحلة التكون إذا سمعت الموسيقى السودانية، أنا شفت فنانين  كثار جو من الخرطوم قبيل أنا بسلم عليكم يا فنانين، الموسيقى بتاعنا هو ملون، دى خلطة بتاعت التعددية، ده عبر التاريخ، لذلك فى الحاضر نرى بأن موسيقانا موجود فى الموسيقى الصومالية والأثيوبية، الفنان محمد وردى إذا مشى أثيوبيا أو مشى الصومال عنده شعبية كبيرة لأننا متقاربون فى ذاك الموسيقى برضو فى الجنوب، وفى الغرب، وفى الشرق، وفى الثقافة دى، الموسيقى ال بتوحد الشعوب هذه هي رؤيتنا للسودان الجديد. لتأسيس وحدة السودان نحن بنقول على أسس جديدة لكن بالفعل ده ما أسس جديدة، ده أسس قديمة أصلا  مكونة من التعددية لكن أنحنا بنقول أسس جديد، عندما تقارنها بالكيفية التى تحكم بها السودان منذ عام 1956م من خلال التقسيم. ربنا خلقنا لنعبده، وبنعبد ربنا لآنو هو الخلقنا العربية الأنا جيت بيه قبيل داك انا خلقتها، وهى لازم تعبدني وفى نفس الأسلوب الدولة الأنا خلقتها لازم كمان تعبدنى مافى حاجه فى أن أعبد  الدولة  دى حقائق  بسيطة  دى ياها الحقيقة لانى قلت قبيل حنقول الحقيقة والحقيقة فقط. بعدين كان أنا مت وأنا لقيت ربنا بتاعى هو مايحاسبنى  على حسب  الدولة الأنا كنت فيها لو أنا كنت فى الدولة بتاع السودان والا دولة بتاع أمريكا ولادولة بتاعت كينيا، هو حيحاسبنى على حسب الحاجات الانا عملتها فى حياتى مش الحاجات الدولة بتاعى عملتها، لكن فى الحاجات  ألانا عملتها. فى العسكرية زى  أنت ماشى المكتب تقيف قدام ربنا فى انتباه، حيقول أنت حضرت؟ ربنا بيقول إنت عملت وعملت وعملت، مش الدولة  بتاعك عملت وعملت وعملت، فالدين ده علاقة بين الإنسان بين الشخص وربه، لذلك علينا ترك الدين للشخص كفرد، والدولة دى بتاعنا كلنا بعض الناس ممكن يختلفوا مع معانا لكن ليس هذا ما سيوحدنا، يمكننا الحفاظ على ديننا، وأن نحتفظ بالدولة بتاعنا فى نفس الوقت. السودان هل لازم تكون دولة إسلامية؟ طوالى حتسيب مجموعة كبيرة من المواطنين مايكونوا سودانيين! وناس تانين يجو كمان بالجهاد أنت بتعلن الجهاد على منو؟ على مواطنينك؟ بهذا أنت حتكون غلطان بالكامل عند إعلانك الجهاد على مواطنينك، وبعدين بتقول أنك عايز الوحدة؟ وده تناقض أنك تعلن الجهاد على بعض أجزاء من دولتك وفى نفس الوقت تقول أنك عايز توحيدهم! أنت ما بتوحدهم، أنت  بتقتلهم! وتقول السودان دولة عربية! النوبة وين؟ الفور وين؟  والنوير وين؟  والزاندى وين؟  والبجه وين؟ السودان باجماعة دولة سودانية ده هو  البيشملنا كلنا ده هو معني  بتاع السودان الجديد نحن قد تعودنا كثيرا على الكذب والخيال أتعودنا على الكذب أنو إذا قالوا السودان دولة عربية دى بتسمع وكأنها موسيقى عادية لكن إذا قلت السودان دولة فوراوية بيقولوا الزول ده مجنون شيلوه للمستشفى لكن الفور سودانيين فمن الصاح أنو السودان دولة بتاعنا كلنا ده مش العروبة ياهو حتوحدنا علشان أنحنا ماكلنا عرب صاح بعض من أبناء السودان من قومية العرب هذه حقيقة لكن ده ما بتوحدنا، أنا بقول العروبة لم توحدنا أنا مش ضد العروبة أنا مش معاكس للعرب والعروبة ومع كل البيقولوه ده لكن كلنا نكون سودانيين حتى مع العرب ديل ذاتهم بالاضافة إلي العرب ديل. والرؤية  ديى أنحنا بنتمسك  بيها، هذه هى رؤيتنا وهى شاملة، وهى غير مستثنية الشمولية وهى التى توحدنا وليست الاستثنائية. والدولة السودانية قد أسست منذ عام 1956م  على الاستثنائية ونحن نريد تغيير كل ده علشان نحافظ على وحدة السودان، أنا الواقف  قدامكم دا أنا وحدوى لكن ناس الخرطوم بقولوا أنا إنفصالى ، انفصالي كيف؟ أنا فى شهر يوليو قابلت الرئيس عمر البشير، أنا بناديه رئيس أنت لازم تنادى الناس بالإسم  أل بسمو بيه، أنا بسمع فى الخرطوم بنادونى المتمرد جون قر نق ، يأخى نادينى بأ ألأنا بنادى بيه نفسى في ناس بيقولوا أنا رئيس بتاعت الحركة الشعبية لتحرير السودان ليه يوجع عشان يقولوا لى الكلام ده؟ بشير فى ناس يقولوا هو رئيس بتاع السودان أنا بقول هو الرئيس  بشير لأن هذا هو لقبة، لماذا نرفض عليه ذلك؟ أنا ماعندى مانع فى أنو ينادونى متمرد، فى الحقيقة أنا مابفرض على الناس انوا يكونوا  متمردين انت لمن تشوف الحاجات البتحصل فى السودان فدى البتثير المشاعر،  فإنت إذا مابقيت متمرد فى السودان فإنسانيتك بتصبح مشكوك فيها، فأنا أظن أننا كلنا فى السودان متمردين بس الاختلاف بتكون فى الدرجات، حقتنا ده زايد من حقت ناس تانين، بتاعت بعض الناس يمكن لسه. لكن حيوصلوا علشان حيضغطوك، كان ضغطوك أنت حتتمرد.
أنا  قابلت الرئيس بشير فى كمبال وأنا تحديته، أنا قلت ليه أنا أكبر وحدوي منك ويمكنني إثبات ذلك، هو قال لى أثبتو وأنا أثبت ذلك أنو أنا وحدوى أكثر من بشير وفى أم درمان الراديو والتلفزيون بيقولو انا رجل انفصالي! أنا قلت يابشير أنت عملت اتفاقية مع ناس اتمردوا عنى عشان شنو؟ هم قالوا أنا وحدوي مرقوا منى ومشوا كونوا حركة أسمها حركة لانفصال جنوب السودان كونوا جيش أسمه جيش لانفصال جنوب السودان. ناس رياك مشار هم الكونوه ومشوا عملوا اتفاقية معاك أنت بشير.  أنا قلت ليه فى كمبالا أنت سبتنى أنا ده البنادى بوحدة السودان وأنت مشيت عملت اتفاقية مع انفصاليين، إذا عملت وحده مع انفصاليين أنت شنو؟ ما أنت بقيت أنفصالى كمان! أنا لا أتحدث ضد رياك مشار هو حاليا عضو بتاع الحركة أنا بديكم مثال، وقبل أيام كان عندنا مؤتمر ورياك مشار  حلف كعضو بتاع الحركة ناس الخرطوم لسع قاعدين يفرفروا ده عربي بتع جوبا لسع قاعدين يفرفروا بقولوا تعال، تعال، يومداك ده نحن  ماطبقنا الاتفاقية ديه بطريقه صاح تعال نطبقه مرة ثانية رياك مشار قال لا. فالسودان الموحد القوى ما ممكن تتبني على أسس بتاعت تفرقه وعلى العروبة والإسلام. العروبة والإسلام هى جزء من واقعنا، فنحن نتقبلهم، أنا بقبلهم لأن أغلبية مواطنين بتاعنا هم مسلمين أنا أقبل هذا نحن عندنا الكثير من مواطنينا من أصول عربية أنا أقبل ذلك ولكن فلنقبل بأن هنالك آخرون ، نعم هنالك آخرين ويجب إحترام والإعتراف بحق الآخرون إذا لم نفعل ذلك فكيف سنتوحد؟ وعلى هذا الأسس يقال بأن المحبه (او الأحسان) تبداء فى المنزل فالوحدة أيضا تبداء فى المنزل لذلك أدعوكم أنتم النوبة بالوحدة ياهو دا عندنا أحزاب النوبة الاربعة قبيل أنا ذكرتهم وولدهم الصغير الأسمه الحركة الشعبية ده النتج من نضال شعب النوبة دعونا نتوحد الآن، بحيث يمكننا تحقيق الهدف بتاعت النوبة إذا إتوحدوا زى يدى ده، باجماعه أنت بتعمل بونية كيف؟ زى ده؟ ولا زى ده؟ أيوا كده، ده توحيد عشان كده انا بسألكم قبل ما أمشى وأسأل الوحدة الكبيرة بتاعت السودان، بأن لازم النوبة يتوحدوا علشان يحققوا الأهداف الخاصة بتاعت النوبة ودى هى رؤيتنا، رؤية الحركة دى رؤية السودان الجديد نحن متمسكين بالوحدة دى حتى فى الظروف الصعبة وأنو انحنا قد إهتزينا فى عام 1991م وأنو ناس بشير مشو وعملوا أتفاقية مع ناس رياك مشار أنحنا ما سبنا الهدف دا فى الظروف السيئة ديك أنحنا ماتخلينا عنها الآن هذا هو مستقبلنا وياهو مستقبل أبناء السودان دا السودان الجديد ليس هنالك رؤية أخرى يمكن أن توحد السودان، لأن رؤية السودان منذ الاستقلال جابت لينا الحروبات حرب لمدة  ( 17) عاما الحرب الأول بتاع الأنيانيا والأنيانيا الأولى وألأنيانيا الثانية والآن نحن فى العام العشرون يجب أن نتعلم بأنفسنا علشان نحقق الهدف بتاع السودان الجديد لازم يكون فى تحول، تحول فى الوسط فى العاصمة الخرطوم زاتو، فى العاصمة الخرطوم لان هذا هو الذى يجمعنا ولهذا فى مشاكوس عندما قلنا بأن يصبح الخرطوم عاصمة حرة كنا نتحدث عن وحدة البلاد لان ذلك هو الذى سيوحدنا ما ممكن تقول مافى شبر من العاصمة يكون حر من الشريعة، إذن إنت بتطرد الناس لبره. كيف توحد الناس لو مافى شبر؟ حنمشى نقعد وين؟ المهم هنا دا  التحول فى الوسط داك، فأهلنا بيقولوا السمك، أنا عارف مافى بحر كبير هنا فى الجبال فيكون مافى خبرات مع السمك لكن أهلنا  بيقولوا السمك بعفن فى راسه مابيعفن فى ذيله فمصيبة السودان دا فى راسه ده مش فى ذنبه، لا فى جبال النوبة ولا فى الجنوب ولا فى دارفور ولافى البيجه، لا د ا فى الخرطوم ده ياهو قاعد بلخبط فلازم يكون فى تحول فى الوسط بقوه أو بسلام، بالسلام أفضل أحسن تتم التحولات فى السودان بطرق سلمية ولقد ذكرنا ذلك ونحن ملتزمون بالحل السلمى لمشاكلنا، بالنسبة لقضية النوبة أريد أن اوضح بعض  الملحوظات عن قضية النوبة، فقضية النوبة بقت فى قلب بتاعت مشكلة السودان زاتو، ليه؟ ده علشان النضال بتاع شعب النوبة، ده ماساكت ده مارخيص أنحنا مشينا فى بورقينستوك عشان نتفاوض، نعمل مفاوضات والنتجت فى وقف اطلاق النار فى جبال النوبة ده شرف بتاعكم ياشعب النوبة هناك فى سويسرا مشوا عملوا تعريف بتاع النوبة نحن كنا بنقول فى الحركة جنوب كردفان فى الخرطوم برضه بقولوا ولاية جنوب كردفان لكن الاتفاقية العملناه فى سويسرا جابت الحقيقة، قالت شنو إقليم جبال النوبة ليه إقليم جبال النوبة علشان فى لقاة، لقاوة وغرب كردفان  ده صاح داك فى غرب كردفان لكن حسع بقى إقليم جبال النوبة ده مهم عشان الإسم بتاع النوبة مقسم على الأقاليم. ده إقليم جبال النوبة لازم نقدر المعنى بتاع الكلام ده لأنو عنده علاقة بالحرب ومع الأرض لذا فالإتفاقية هى إتفاقية وطنية نصت على أن هذه الأرض ملك للنوبة، لهذا الأقليم نحن مابنقول ناس تانين مابيقعدوا فى هذا الأقليم، ده تعريف بتاعت المنطقة ناس تانين ممكن يجو ويقعدوا هنا لكن ده ارض بتاعت النوبة، فأنا بجى هنا زاتو وبعمل لى قطية هنا وأنا بكون مواطن فى إقليم جبال النوبة فده نضال بتاعكم وبتاع أبناء النوبة ياهو الجاب الأتفاقية بتاعت سويسرا بتاعت وقف اطلاق النار، ده النضال العملناه مع الشعب بتاع النوبة والشعوب الأخرى فى السودان، النضال ده مش الكفاح المسلح فقط النضال فيه أنوع كثيرة، قبيل أنا عملت تهنئة لنسوان بتاعنا فى جبال النوبة علشان النضال بتاعهم ماشرط أنهم شالوا بندقية ومشوا فى المعركة لكن هن ناضلوا بطرق كثيرة يمكن أصعب من البندقية، زى يومداك فى كبويتا أنا كنت بخاطب النسوان بتاع التبويسة وأنا قلت إنتو النسوان بتاعت التبويسة انتو عملتوا شكلة كبيره قالوا شكلة شنو؟ قلت الحاجات الإنتم جبتو للجيش ده فى مريسه أبيض فى عصيده، بعدين كان ناس فى مناقشة قالوا كبويتا سقطت كيف؟ نحنا شلناه كيف؟ العسكرى بيقول أنا ياهو ضربت جبخانه المرآة بتقول والله كان كان ما مريسة بتاعتى دي كبويتا ماكان شالو بعدين الموطنين الجو مع تور بتاعهم وتبرعوا للجيش بقول والله كان كان ما تور بتاعى الأحمر ده كبويتا ده ماكان شالو، وده كله حقيقة فالنضال عنده طرق كثيرة، ونحن قلنا لتحقيق الهدف بتاع السودان الجديد عندنا أربعة وسائل أو أربعة  طرق بتاعت نضال، فى الكفاح المسلح ياهو الجيش القدامكم  ده، ده طريق ضرورى إذا ماعندك قوه الحق بتاعك بشيلوا مع الزول العندو قوه فنحن المهمشين  ماعندنا قوه فى السودان، فمشينا فى الغابة عشان نكون قوه، عشان قوه مافى، فنحن كونا قوه دي، ده ما الطريق الوحيد، برضو إذا ما عندك قوه، وماعندك تعليم حاجات بتاعك بشيلو بأونطة، ياهو السبب ده قبيل أنا عملت تهنئة للطلبة أنو لازم تمشوا المدرسة لأن حتى لو ماعندك قوة وماعندك تعليم حاجات بتاعك بشيلوه بأونطه، فأدرس كويس. وناس بتاعت الغرفة التجارية فى النوبة هنا حتى لو عندك قوة وعندك تعليم وما عندك فلوس والله يجى ببيعو إنت وبرضه  لازم نعمل إقتصاد وتعمل أنتاج عشان يكون عندنا قروش. السودان الجديد لازم يكون شامل فالطريق واحد، ده كفاح مسلح ده طريق واحد الطريق الثانى الوسيلة بتاعت النضال هى الانتفاضة دى مهم بالنسبة  للناس الجايين من الخرطوم والانتفاضة اشتغلت مرتين فى تاريخنا فى سنة 64 وفى 85 ده برضو طريق بتاع نضال. الطريق نمرة ثلاثة ده الضغوط على الدولة،  أنحنا مابرانا أنحنا مع بعض العالم  وزى ما الناس بيقولوا العالم قد أصبحت قريه صغيرة فما ممكن تعمل نضال بدون الأخرين  أو بدون مداخيل بتاع الآخرين فلازم تخاطب المجتمع الدولى ده برضو طريق بتاع نضال. طريق نمرة 4 ده طريق  بتاع تفاوض عشان توصل للحل السلمى عبر المفاوضات ده ياهو  ألأنحنا بنعمله فى مشاكوس فى الايقاد فنحن بنعمل توحيد للأربعة ديل كلهم، نحن بنعمل الأربعة حاجات ده كله الكفاح  المسلح، الأنتفاضة  والنضال بتاع الشعب خاصة فى المدن، وأنا بحى كفاح كل الطلبة فى السودان للنضال بتاعهم. فى الطريق نمرة أربعة هو الطربق بتاع الايقاد بتاعت المفاوضات ده واحد من الاسباب أو السبب الرئيسى بتاعت المؤتمر ده، أنحنا  فى مشاكوس وفى النوبة، وفى جنوب النيل الأزرق والحاكم بتاعنا بتاعت جنوب النيل الأزرق هو مالك أقار موجود هنا ده من أبناء   أنقسنا بالفونج، برضو فى قضية بتاعت منطقة أبياى أهو ناس أدوارد لينو من ابياى. واحد من المشاكل فى الايقاد فى مشاكوس فى سوء تفاهم، فى تشويش بقولوه ناس الخرطوم الحكومة بتقول المناطق الثلاثة دى ماتابع للجنوب، دى دعاية ساكت أنحنا مابنتكلم عن الجنوب نحن بنتكلم عن السلام ونحن بنتكلم عن المناطق بتاعت الحركة الشعبية والجيش الشعبى لتحرير السودان نحن بنتكلم عن الحركة الحكومة  عايزه تتكلم عن الجنوب دى سياسة بتاعت تفريق تقول انتو النوبة براكم وأنتم ناس إقليم جنوب النيل الأزرق براكم، الجنوب براكم  وأنتم  مالكم  مع  الجنوبيين؟ ما كان يسألوا أنتو مالكم مال الحركة؟ نحن بنتكلم عن الحركة مش عن الجنوب المنطقة، وأى حاجه أى حلول بتاعت مشاكل السودان عبر الحركة لازم تشمل الجبال لازم تشمل ابياى لازم تشمل جنوب النيل الأزرق عشان دى المناطق الفيها الحركة الشعبية لتحرير السودان ده مهم عشان الحكومة بتجيب الكلام ده علشان يقسم بية الناس بتمشى للجنوبيين بتقول النوبة ديل ياهم مشكلتكم اذا ما كان فى نوبة انحنا كان وديناكم، لكن ياهو جون قرنق مشى جاب النوبة بتاعوا ديل وجاب النيل الأزرق وجاب محلات تانى، الحاجة دى بقت معقدة، ده كلام فارغ الحركة تطورت الحركة قوية عشان النوبة فأنا عاوز أوكد ليكم وأنا بتكلم  هنا فى جبال النوبة أنو جبال النوبة، منطقة جبال النوبة، الأقليم بتاع جبال  النوبة جزء لايتجزء من الحركة وأى حل الحركة حتتوصل ليه مع الحكومة لازم يشمل جبال النوبة ويشمل ابياى ويشمل جنوب النيل الأزرق ده واحد من الوسائل بتاعت النضال، النضال سواء كان فى أبوجا ولا فى إيقاد ولا فى اى محل آخر. مشاكوس والايقاد يمكن يفشل لكن الوسيلة بتاعت النضال  مستمرة وبالنسبة لجبال النوبة  الحكومة عايزه تعمل دى قضية والله كان كان ما الثلاثة مناطق ديل أنحنا كان إتوصلنا لإتفاقية، ده كلام فارغ الحركة كانت موجودة وجبال نوبة وابياى وجنوب النيل الأزرق كلها كانت موجودة قبل مشاكوس ده أنتو عارفين زاتو دى مدينه فى كينيا، الحركة بتاعنا دى  بما فوقه النوبة كانت موجودة قبل مشاكوس وحتكون موجودة بعد مشاكوس فما يعملوا تشويش للناس دى مفاوضات لتحقيق ألاهداف بطرق سليمة ونحن ملتزمون بذلك إذا نجحت بالطريق ده فأهلا وسهلا نحن سنقدر ذلك، اذا ما نجحت فنحن سنواصل مع الوسائل الاخرى. فى مشاكوس فى تقريبا خمسة أو سته حاجات لازم تتحل عشان نصل لإتفاقيه وده صعب لانو حنشوف فى القضية بتاعت الثلاثة مناطق ديل الحكومة بنقول ماتابعه للجنوب ونحنا ماقلنا زاتو تابعه للجنوب نحنا قلنا فى قضية  فى المناطق الثلاثة ديل لازم يحلو ونحنا قلنا المناطق ديل تابعه للحركة والحل بلقوه عبر الحركة فلازم يكون فى الرؤية الصحيحة أنحنا بنقول الحركة بتمثل فى مشاكوس شعب جبال النوبة وإبياى وجنوب النيل الأزرق، القضية بتاعت النوبة  أنا قلت قبيل فى قلب بتاعت مشكلة السودان، ليه؟ عشان النضال بتاعكم  المهمشين كثير فى السودان مافوقة النسوان زاتو هن مهمشات أكثر، آى أنا موافق معاكى هن مهمشات أكثر. فى مهمشين  كثير لكن  أنتم فى مشاكوس وفى ايجاد عشان الحركة عشان النضال بتاعتكم فى الحركة دى الحقيقة، الفور مش مهمشين؟ ليه هم مافى مشاكوس؟  عشان هم مافى الحركة هم فى النضال وهم مافى الحركة، البجة برضو فى النضال ومهمشين لكن مافيشين فى مشاكوس عشان هم ماجزء  بتاعت الحركة اذا كانوا جزء بتاعت الحركة كانوا حيمثلوا بواسطة الحركة. فالشى ألانا عايز أقوله انو أهلنا فى الجنوب فى الجبال فى جنوب النيل لأزرق وفى ابياى قد تم تمثيلهم بواسطة الحركة وأنا أريد أن أكد لهم بأننا سوف لن نخذلهم، أنهم لم يخذلوننا وما فى محل فى الجنوب عسكرى بتاع نوبة ما مات فوقة، القوة ألأنا مشيت بية فى سنة 90/ 1991م لغرب الأستوائية كان مكون أغلبيتة من أبناء  النوبة فانهم لم يخذلونا فى النضال، فى الشكلة فنحن سوف لن نخذلهم فى الكلام دى أسهل حاجة كيف أنهم ماخذلونا فى الشكلة وأنحنا  نخذلهم فى الكلام؟ فدى واحد من الحاجات لازم يلقو ليهو حل فى الايجاد. فى إعلان أسمرا بالنسبة للتجمع نحنا قلنا حق تقرير المصير ده يطبقوه لكل الشعوب فى السودان ده حق بتاع شعب ناس قالوا آى طيب نجى حسع نستخدم الوسيلة بتاع حق تقرير المصير عشان نوقف بيه الحرب، فقلنا آى نطبقوه فى الجنوب ونطبقوه فى الجبال وفى جنوب النيل الأزرق وفى أبياى وكان فى مناقشة كبيرة جدا فى ناس بسهولة بيقولوا  آياى الجنوبيين يستحقوا عشان يكون عندهم حق بتاع تقرير المصير طيب النوبة ماشعب ياجماعة؟ هم شعب فالحكومة  عابره تقول أوع انتو النوبة خلو بالكم من حق تقرير المصير ، ده حاجة بطال! ما أنتو ياهو بتشوفوا كان بطال ولا مابطال وبالتالى مافى  زول بعقله الصحيح مافى زول ممكن يقول أنا ماعايز أحقق مصيرى طيب منو الحيحققوا؟  الحيحقق ليكم ده منو يعنى؟ فالهدف بتاعت الحكومة أنها يتحاول تقول ليكم أنو ابعدوا من تقرير المصير عجيب ومنوا  البيقرر ليكم؟ أنت بنفسك طبعا هل شخص آخر سيقرر  مصيرك؟  لا أنت الذى ستقرر مصيرك ولاتسمح لاحد أن يقنعك بأن دى حاجة بطالة ليك لانك تعرف ياهو الكويس وياهو البطال  ليك. الحاجة التانية دى كان الحاجة الأولى اللى يجب أن تتحل فى مشاكوس، حاجة نمرة أثنين ده موضوع بتاعت الجيش أنحنا بنقول فى مشاكوس أنو فى الفترة ألانتقالية حتكون فى جيشين، جيش بتاع بشير والجيش الشعبى، ومافى جيش واحد بشيلو لجيش ثانى. مافى أستيعاب ، أنا الواقف قدامك ده أستوعبونى مرة لقد تم إستيعابى مرة من قبل  عندما  كنت  فى حركة  ألأنيانيا  وماحيستوعبونى للمرة  الثانية ولهذا أنحنا بنقول لازم يكون فى جيشين خلال الفترة الأنتقالية ومن ثم الذى سنتحدث عنه فى مشاكوس هى العلاقة بين الجيشين يعنى أين سيتم نشرهم، كيف ستكون علاقتهم مع بعضهم البعض ولكن أريد أن أؤكد لكم بأنه لن تكون هنالك إتفاقية تستوعب الجيش  الشعبى فى جيش البشير نحن أكبر من أن نستوعب. موضوع نمرة ثلاثة ده موضوع أنا أشرت ليه قبل كده ده موضوع  بتاعت العاصمة القومية، العاصمة القومية يجب أن تحكم بقوانين قومية وليس بقوانين دين واحد الآن عندما أديان كثيره فى الدولة فكلام ناس الخرطوم البقول ده مافى شبر من العاصمة القومية! طيب يبقى قومية كيف؟ قال ما فى شبر من العاصمة القومية حتكون بدون تطبيق شريعة كيف تبداء الوحدة يمثل هذه الشعارات؟ أنحنا قلنا الستة سنوات دى بتاعت الفترة الأنتقالية دى علشان بتاعت بناء للثقة ووضع المؤسسات فى  مكانها لتوحيد السودان ماممكن تبدأء الفترة الأنتقالية بعاصمة تسودها الشريعة، اذن أنت لاتوحد الدولة ليه ننظر الستة سنوات دى؟ مانعمل الاستفتاء من حسع ده اذا كان بدايته زى ده، فده كلام نمرة ثلاثة الناس بيناقشوا فى مشاكوس انحنا قلنا طيب أنحنا نحترم الكلام بتاعت الشريعة دى خلي يكون عندنا جيب فى الخرطوم ومحظوظين أنو العاصمة الخرطوم عنده ثلاثة مدن فى الخرطوم بحرى فى أم درمان  وفى الخرطوم جوه ، أدينا واحد من  الخرطومات ده وكن فى الأثنين ديل طبق فوقهم الشريعة وأدينا واحد منهم، ياجماعة الطلب ده ماطلب منطقى؟ اذا ما أدانا الثلاثة دى كلها أو واحد من الثلاثة دى طيب حنخت العاصمة القومية وين؟ فده كلام نمرة ثلاثة كلام نمرة أربعة ده موضوع بتاعت الرئاسة الطلب بتاعت الحركة، أو الموقف بتاعت الحركة نحن قلنا الفترة الانتقالية ده ياجماعة طويلة ست سنوات خلى نقسموه على أثنين ثلاثة سنة يدوها لبشير وثلاثة سنة  الثانية يدها للحركة دى بالنسبة للرئاسة، ده ياهو الكلام ده ناقشوه كثير، الحركة تنازلت قالت خلاص نحن بنشيل النائب الأول بشروط قالوا لا للتناوب قالوا لا للنائب الأول المشروطة ده طيب هم عايزين شنو؟ ياهو الوسطاء بيقولوا ياجماعة فى اللغة العربية فى كلمة بتعنى التقسيم، تقسم السلطة، تقسيم الثروة ناس الخرطوم وكأن التقسيم يتعنى انو يأخذوا كل حاجة! التقسيم ده معناه لازم حاجة تمشى منك أنت مش ماتقسم حاجة مع زول ثانى وليسه عندك ميه فى الميه ليه؟ يبقى ده ماتقسيم فده برضو مشكلة، كلام نمرة خمسة ده موضوع بتاع تقسيم الثروة بقسمو كيف ناس بنزين، ناس جاز وكل الحاجات ده بقسموه كيف؟ نحن بنقول الحركة والله تعبت وناس الجبهة شالوا كله الحاجات كده ادونا 80% بتاعت  الكلام ده للتنمية بتاعت المناطق المهمشه مش جنوب براه بالنسبة للحركة ناس خرطوم قالوا لانديكم 5  % فالنقاش بين خمسة فى المية وثمانين فى المية، والفرق كبير، الحاجة الاخيرة ده موضوع بتاعت حقوق الأنسان، الديمقراطية وتكوين حكومة عريضة بتاعت وحدة  وطنية فى الفترة الإنتقالية برضو ده فوقو كلام كثير أنحنا بنقول صاح فى مشاكوس ده الحركه و الحكومة ياهو فى المفاوضات لان دى حقيقة الأوضاع لكن عشان  القيمة بتاعت الأتفاقية  ديه  يحترموها الآخرين لازم  نجيب الآخرين، القوى السياسية الأخرى بما فوقه التجمع بما فوقه الأحزاب الأربعة الأنا قلتها دى فعندما نتحدث عن تقسيم السلطة نحن بنشمل الآخرين حتى المليشيات البتشاكل جنب البشير ديل من جنوبيين ناس بول  متيب ناس أسماعيل كونى وناس المندارى والآخرين نحن سنرحب بيهم فى الحكومة بالجنوب عشان هم جنوبيين اذا فى كمان ناس  زى ديل فى جبال النوبة انتو رحب بيهم كمان عشان هم من النوبة أنتم أخوة واخوات فلازم يكون فى صلح ووحدة بين الناس فنحن برضو بنمد يد بتعنا لكل الناس ديل. فى خمسه حاجات فى مشاكوس اذا ليقنا حلول للمشاكل ديه ومشاكل اخرى نحن ممكن نتوصل لإتفاقية وسلام عبر مشاكوس اذا ما وصلنا حل فنحن حنستمر فى النضال بالطرق ألاخرى، ونحن حنجيب الأتفاقية ديه زاتو للجماهير بتاعنا، نحن بنجيبو هنا فى الجبال نحن حنقول ياجماعة ياهو الأتفاقية الوصلنا ليه فى مشاكوس ده كويس ولا بطال؟ وانتم تقرروا ونحن فعلا طبقنا الكلام ده إستشارة الجماهير بعد برتكول مشاكوس، بعد مشاكوس واحد كان فى برتكول بتاعت مشاكوس نحن نادينا كل واحد كل القيادات بتاعت الحركة لمؤتمر كان فية تقريبا 180 قيادى وفى ناس من الجبال هنا مشو فى المؤتمر ده عشان نقول ليهم ياهو بروتكول  مشاكوس ويعملوا تقييم بتاعت بروتكول وتوصيات مشاكوس. فالمؤتمر داك عمل توصيات لمشاكوس أثنين ومشاكوس اثنين ياهو فرتك مشينا  مشاكوس ثلاثة عملنا امتداد لوقف اطلاق النار لغايد يوم 31/ مارس  / 2003م وبرضو مضينا مذكرة تفاهم برضو نادينا الناس تقريبا اكثر من  200فى الأسبوع  الفات دى وبرضو عرضنا مذكرة التفاهم دى للناس، حنعمل نفس الشيى مع اى اتفاقية نحن بنتوصل عليه حنجيبه ليكم، فمافيش تخوف، قالوا الحركة بتسيب ناس النوبة بره وبيعملوا إتفاقية، دى دعاية من الخرطوم ده مابتحصل سنستشيركم دائما ده ياهو المعنى بتاعت الحركة الشعبية ماممكن نكون حركة شعبية بدون مانتشاور مع الناس. فى الآخر أنا عاوز أؤكد برضو أنه الحركة الشعبية لتحرير السودان، ده  تحرير من شنو مش من منو والحركة دى مابتكون فى الجنوب بس ما حتكون محصورة فى الجنوب  فقط نحنا بنمشى فى كل السودان نؤسس الحركة دى من نمولى لغاية حلفا ومن الجنينة لغاية كسلا عبر الخرطوم دى حركة شعبية ديمقراطية  للسودانيين كله فالسؤال البقول جبال النوبة  وابياى وجنوب النيل ألأزرق قال ما تابع للجنوب ماوارد فنحن حركة حنكون فى كل السودان فكلامهم قال ماتابع للجنوب الحركة الشعبة ما للجنوب فقط دى ياهو السبب أنا هنا لسه ماعملت قطية هنا، كان عملتو قطية  هنا بعدين حنكون منكم فأنا بشوف انو المؤتمر بتاعكم  دا مهم، مهم لسببين فى رآى والرآى الأخير متروك ليكم ولكن النصيحة منى أنه فى حاجتين مهمات حقو تناقشوه موضوع المفاوضات بتاعت الأيجاد فى مشاكوس والموضوع ألأنا قلته قبيل عن اقليم جبال النوبة موضوع الأرض لأن الناس بتناضل علشان الأرض ده الحاجتين ديل هم أهم الحاجات فى رآى والتى يجب أن تخاطبوها وأنا ما شفت  ألأجنده بتاعكم لكن ديل مهمات للنوبة ياهو انحنا ماشين مشاكوس توصياتكم شنو لينا فى مشاكوس؟ علشان فى مشاكوس الحكومة وفى الحركة والحركة بتمثل المصالح بتاعت النوبة، الحركة مثلت مصالح النوبة فى سويسرا عندما تم التوصل لاتفاق وقف اطلاق النار وأجبرت  الحكومة لاول مرة فى اربعتاشر سنة عشان يجيبو أغاثة للجبال ده عبر الحركة برضو مشاكوس وبالنسبة لمصالح بتاعت النوبة ممكن يجبروا الحكومة عبر الحركة علشان مافى زول ثالث فى مشاكوس ده نحن والحكومة و أنتم حتودوا التفويض بالنسبه لمصالح النوبة لمنو؟ للحكومة ولا للحركة؟ اذا فى شخص سيتحدث بالنيابة عنكم فى مشاكس؟ طبعا للحركة أنتم فى مشاكس عشان الحركة مش عشان الحكومة وأنا قلت قبل انو الفور ماهناك رغم أنهم بيناضلوا والفور ماهناك لأنهم ماأعضاء فى الحركة البيجة ما هناك لأنهم ما أعضاء فى الحركة النوبة هناك لأنهم أعضاء فى الحركة فناقشوا قضية مشاكس واذا ماتوصلتوا لآى حاجة فأحسن حاجة تقولوا نحن بنفوض الحركة. حتى التجمع الوطنى الديمراطى عمل تفويض للحركة فى أسمرا الا النوبة بتاعى ده ياهو مايعمل لى تفويض؟ فده حاجة واحده مهمة بالنسبة للمؤتمر ياهو ده فى ألأرض وفى الأتفاقية بتاعت سويسرا وفى بعض من الحاميات بتاعت الجيش المفروض الجيش يمرق من الحاميات دى عشان الناس عايزيين المحلات الصالحة للزراعة دي وينزلوا تحت عشان يزرعوا ألارض الصالحة للزراعة وقضية الأرض عموما دى حاجة ملحة علشان يخاطبتها الآن الأرض ملك لكم ملك لشعب النوبة ياهو منطقة جبال النوبة دى ماتكون فى الورق ساكت عايزين يشوفوا، كم بوصة من الأرض ده فعلا تابعة للنوبة ده لازم يشوفوه.
فى الآخير أنا عايز أشكر المجتمع الدولى للمساعدات الأنسانية عايز أشكر المجتمع الدولى والمنظمات الغير الحكومية الموجودة هنا للخدمات التى يقدمونها لمواطنينا فى جبال النوبة دى بتعمل فروقات كثيرة، أريد ان أكرر مرة أخرى الالتزام بتاعت الحركة فى القضية بتاعت المناطق الثلاثة، بما فيها جبال النوبة أنه نحن لن نخذلكم فى مفاوضات مشاكس أنتم جزء لا يتجزء من الحركة مهما تكن الأتفاقية الحركة حتتوصل ليها، فهى حتشمل جبال النوبة أريد أن أؤكد لكم برضو بالنسبة للإتزام بتاعتنا للسودان الجديد الهدف بتاع السودان الجديد سنواصل  النضال فى أى ظروف لغاية مانحقق الهدف بتاع السودان الجديد.
الجية بتاعتى هنا علشان  نحاضر معاكم ونخاطب المؤتمر ده، ده تأكيد لابناء النوبة وكل المهمشسين فى السودان أنه أنحنا بنا خذ القضية  بتاعت جبال النوبة بجدية خالص، نحن جادين، نحن جادين ونحن ما بنسيب الهدف بتاعتنا والنوبة جزء لاتتجزء من الحركة وده ياهو السبب ألأنا هنا ده، كان فى نقاش قال اخاطبكم بالتلفون أنا بشوف حسع الصعوبة بتاعت التلفون ده قبيل أنا موجود هنا كان فى صعوبة عشان بجيبوا مايكرفون ويعملوا التوصيلات عشان أتكلم هنا معاكم إذا كان سيكون شبه المستحيل إذا كان بالتلفون كان ما ممكن  أصلوا. عشان كده أنا قررت أجى عشان أحييكم شخصيا وعشان تشوفوني وأؤكد لكم شخصيا أنو الحركة وأنا فى الرئاسة بتاعت الحركة معاكم .
                                                   شكرا جزيلا